రకుల్ నెల రెస్ట్.. ఊహాగానాలు

Posted: 11/20/2017 06:51 PM IST

గ్లామర్ వరల్డ్ లో ఒక్కసారి అడుగుపెట్టాక కెరీర్ దూసుకుపోతుంటే ముందుకు వెళ్లిపోవాలే తప్ప బ్రేక్ తీసుకోవాలని ఏ హీరోయిన్ అనుకోదు. ఒకవేళ అలాంటి ప్రయత్నమే గనుక చేస్తే మాత్రం ఆ గ్యాప్ లో కొత్త వారి రాక తర్వాత చాలా కష్టంగా మారుతుంది.

ఆ మధ్య ఆరోగ్య సమస్యలతో సమంత సతమత మయిన సమయంలో రకుల్ ప్రీత్ సింగ్ అలా దూసుకొచ్చిన బాపతే. ఇప్పుడు రకుల్ కూడా అలాంటి నిర్ణయమే తీసుకోబోతుందని సమాచారం. ఈ మధ్యే ఆమె నటించిన ఖాకీ చిత్రం విడుదలై విజయవంతంగా దూసుకుపోతుంది. ప్రస్తుతం రకుల్ చేతిలో సినిమాలు కూడా పెద్దగా లేవు. దీంతో కొత్త సినిమాలకు సైన్ చేయకుండా ఓ నెలపాటు గ్యాప్ తీసుకోవాలన్న ఉద్దేశ్యంతో రకుల్ ఉందంట.

దీని వెనుక ఆమె తల్లిదండ్రుల సలహా ఉన్నట్లు తెలుస్తోంది. ఈ వార్తలకు బలం చేకూరుస్తూ మంచి స్క్రిప్టులు వస్తేనే ఇకపై సినిమాలపై నటిస్తానని రకుల్ బల్లగుద్ది చెప్పటం చూస్తుంటే రకుల్ కెరీర్ ఇక ముగింపు దశకు చేరుకుందా అన్న అనుమానాలు కలుగుతున్నాయి. కానీ, ఈ ఢిల్లీ సోయగం మాత్రం విరామం తాత్కాలికమే అని చెబుతోంది. చూద్దాం ఈ గ్యాప్ లో ఏం జరగబోతుందో?