పవన్ కల్యాణ్ ‘వకీల్ సాబ్’ కోసం బరిలోకి అందాల రాక్షసి

Posted: 03/16/2020 08:37 PM IST

టాలీవుడ్ నటుడు పవర్ స్టార్ పవన్ కల్యాణ్ మూడేళ్ల తరువాత సినీరంగంలోకీ రీ-ఎంట్రీ ఇస్తూ.. పవర్ ఫుల్ న్యాయవాది పాత్రలో మెరువనున్నారు. ఈ మేరకు ఇప్పటికే చిత్రం టైటిల్, ఫస్ట్ లుక్ విడుదలైన నాటినుంచి ఈ చిత్రంలో పవన్ కల్యాణ్ పక్కన హీరోయిన్ పాత్రలో ఎవరు మెరువునున్నారన్న ఆసక్తి అభిమానుల్లో నెలకొనింది. గోవా బ్యూటీ ఇలియానా, శృతి హాసన్ సహా పలు పేర్లు వినిపించాయి. అయితే ఇంతకీ ఫైనలైజ్ అయ్యేదెవరని ఉత్కంఠ నెలకొనంగా చిట్టచివరకు అందాల రాక్షసి ఈ ఛాన్స్ ను కొట్టేసింది.

'దిల్' రాజు, బోనికపూర్ సంయుక్తంగా నిర్మిస్తున్న ఈ చిత్రానికి వేణు శ్రీరామ్ దర్శకత్వం వహిస్తున్నారు. ఇప్పటికే మహిళా దినోత్సవాన్ని పురస్కరించుకుని మగువా.. మగువా అనే చిత్రాన్ని విడుదల చేసింది చిత్రయూనిట్. ఈ చిత్రానికి చక్కని సంగీతాన్ని సమకూర్చారు ఎస్ఎస్ తమన్. ముందుగా ప్లాన్ చేసుకున్న ప్రకారం ఈ సినిమా షూటింగు చకచకా జరిగిపోతోంది. ఈ సినిమాలో నివేద థామస్ .. అనన్య .. అంజలి సహా పలువురు కీలక పాత్రలల్లో నటిస్తున్నారు.

తాజాగా మరో కీలకమైన పాత్ర కోసం లావణ్య త్రిపాఠిని ఎంపిక చేశారని సమాచారం. ఆమె పాత్రకి చాలా ప్రాధాన్యత ఉంటుందని అంటున్నారు. ఈ పాత్ర కోసం ముందుగా ఇలియానాను .. శ్రుతి హాసన్ ను సంప్రదించారు. ఆ తరువాత ఏం జరిగిందన్నది తెలియదుగానీ, లావణ్య త్రిపాఠిని ఎంచుకున్నారు. పవన్ అభిమానులంతా ఈ సినిమా కోసం ఎంతో ఆత్రుతగా ఎదురుచూస్తున్నారు. హిందీ .. తమిళ భాషల్లో ఆదరణ పొందిన ఈ కథ, తెలుగులో ఎలాంటి ఫలితాన్ని రాబడుతుందో చూడాలి.