Posted: 02/14/2012 06:06 PM IST

చిన్న సినిమాగా తాము చేసిన ‘ఎస్.ఎం.ఎస్.’ విడుదలైన రోజు అన్ని థియేటర్లూ ఫుల్ అవడం అనూహ్యమని ఆ సినిమా కథానాయకుడు సుధీర్‌బాబు చెప్పారు. మావయ్య (కృష్ణ), మహేశ్ వల్ల సినిమాకి అంచనాలు వచ్చాయనీ, వారి అభిమానులు చూపించిన ఆదరం వల్లే సినిమాకి మంచి ఓపెనింగ్స్ వచ్చాయనీ ఆయనన్నారు. సూపర్‌గుడ్ మూవీస్ అధినేత ఆర్.బి. చౌదరి సమర్పణలో వేగా ఎంటర్‌టైన్‌మెంట్స్ పతాకంపై విక్రమ్‌రాజు నిర్మించిన ‘ఎస్.ఎం.ఎస్.’ సినిమా ఇటీవల విడుదలైంది.

తాతినేని సత్య దర్శకత్వం వహించిన ఈ చిత్రం విజయవంతంగా ప్రదర్శితమవుతున్న సందర్భాన్ని పురస్కరించుకుని సంస్థ కార్యాలయంలో ఏర్పాటుచేసిన సమావేశంలో సుధీర్ మాట్లాడారు. “తొలి మూడు రోజుల్లో మా సినిమాకి మూడు కోట్ల రూపాయలు వసూలు కావడం ఊహించని విషయం. చక్కని ప్రేమకథని అంతే చక్కగా దర్శకుడు సత్య తీర్చిదిద్దినందునే సినిమా మంచి విజయం సాధించింది. వేలంటైన్స్ డే సందర్భంగా ప్రేమ గురించి చక్కని సందేశాలు పంపినవారికి బహుమతులు అందజేస్తాం” అని ఆయన చెప్పారు.

సినిమా పెద్ద విజయాన్ని సాధించిందనీ, హీరోగా సుధీర్ చాలా చక్కగా నటించారనీ దర్శకుడు సత్య చెప్పారు. ఈ చిత్రం ద్వారా తనని తెలుగు ప్రేక్షకులు ఆదరిస్తున్నందుకు సంతోషంగా ఉందని హీరోయిన్ రెజీనా తెలిపారు. హీరో సుధీర్ మన పక్కింటబ్బాయిలాగే ఉన్నాడనీ, కొరియర్ బాయ్‌గా సహజంగా చేశాడనీ హీరోయిన్ తండ్రిగా నటించిన కాశీవిశ్వనాథ్ అన్నారు. ఈ సమావేశంలో సంభాషణల రచయిత నంద్యాల రవి, కొరియోగ్రాఫర్ శేఖర్, నటులు వినయ్, తాగుబోతు రమేశ్ కూడా మాట్లాడారు.