Posted: 11/05/2012 04:14 PM IST

రాష్ట్ర ముఖ్యమంత్రి కిరణ్ కుమార్ రెడ్డిని ఆ పదవి నుండి తప్పించనున్నారనే వార్తలు మళ్ళీ ఊపందుకున్నాయి. అసేలే నీలం తుఫాన్ అల్ల కల్లోలం చేస్తే.... ఇప్పుడు ముఖ్యమంత్రి మార్పు పై వస్తున్న వార్తలతో మరింత అల్లకల్లోలం అవుతున్నాయి రాష్ట్ర రాజకీయాలు. కేంద్ర మంత్రి వర్గ విస్తరణ పూర్తి కావడంతో, ఇక ఆంధ్ర ప్రదేశ్ రాష్ట్ర రాజకీయాల్ని గాడిలో పెట్టే పనిలో అధిష్టానం పడిందని అంటున్నారు. ఇక ముఖ్యమంత్రి మార్పు పై వస్తున్న వార్తలకు బలం చేకూరేలా... కాంగ్రెస్ సీనియర్ నేత, జాతీయ విపత్తు నివారణ సంస్థ ఉపాధ్యక్షుడు మర్రి శశిధర్ రెడ్డి ఎఐసిసి అధినేత్రి సోనియాగాంధీతో ఇవాళ భేటీ అవడంతో మళ్లీ రాజకీయ ఊహాగానాలకు తెర లేచింది.

ఇక తెలంగాణలో కాంగ్రెస్ కి చెందిన నాయకులు వలసబాట పడుతున్నారు. ముఖ్యంగా తెలంగాణ రెడ్లు. వీరిని కట్టడి చేయడానికి, తెలంగాణ అంశాన్ని 2014 వరకు తేల్చకుండా నాన్చాలంటే తెలంగాణ ప్రాంతంలో రెడ్డి వర్గానికి చెందిన వారికి ముఖ్యమంత్రి పదవి కట్టబెట్టాలనే ఆలోచన చేస్తున్నట్లు వార్తలు. ఈ నేపథ్యంలో మర్రి శశిధర్ రెడ్డిని ముఖ్యమంత్రి పదవికి అధిష్టానం పరిశీలిస్తున్నట్లు చెబుతున్నారు. పిసిసి మాజీ అధ్యక్షుడు డి. శ్రీనివాస్ పేరు కూడా ముందుకు వస్తోంది. అయితే, జగన్‌ను ఎదుర్కోవడానికి రెడ్ల నాయకత్వమే అవసరమని అధిష్టానం అనుకుంటున్నట్లు చెబుతున్నారు.  ఈ నెలలో ఎప్పుడైనా రాష్ట్రంలో ముఖ్యమంత్రి మార్పు ఉండవచ్చునని కూడా ప్రచారం సాగుతోంది. ఈ విషయాన్ని కిరణ్ తో అధిష్టానం చెప్పినట్లు వార్తలు. మొత్తానికి కిరణ్ పదవికి మర్రి శశిధర్ రెడ్డి ఎసరు పెడుతున్నాడని రాజకీయ వర్గాల భోగట్టా.