వేసవి రేసులో ‘టాక్సీవాలా’ వున్నాడా..?

Posted: 05/08/2018 06:02 PM IST

Vijay devarakonda s taxiwala out of summer race

అర్జున్ రెడ్డి సినిమా ద్వారా మాస్ ప్రేక్షకులు, మరీ ముఖ్యంగా యువతలో తనకంటూ ఓ ప్రత్యేకస్థానాన్ని నిలుపుకున్న విజయ్ దేవరకొండ.. అదే ఊపుతో మరో సక్సెస్ ను కూడా అందుకోవాలని మాస్ ప్రేక్షకుల్లో చెరగని ముద్ర వేసుకోవాలని ఉబలాటపడుతున్నా అందుకు మాత్రం బ్రేకులు పడ్డాయి. రాహుల్ సాంకృత్యన్ దర్శకుడిగా పరిచయమవుతూ.. విజయ్ దేవరకొండ హీరోగా రూపోందుతున్న చిత్రం 'టాక్సీవాలా' వేసవి రేసు నుంచి తప్పుకోనుందా..? అంటే అవుననే సందేహాలే వినబడుతున్నాయి.

మే తొలివారంలో ప్రేక్షకుల ముందుకు వస్తానని చెప్పిన టాక్సీవాలా.. చివరకు ఆ తేదికి రాలేకపోయాడు దీంతో మే 18న వచ్చేస్తున్నాను అంటూ టైం కూడా చెప్పి.. మరోమారు కూడా నిరాశపరుస్తున్నాడు. అయితే ఆ రోజున కూడా తాను ప్రేక్షకుల ముందుకు రావడం కష్టమేననే టాక్ ఫిల్మ్ నగర్లో వినిపిస్తోంది. ఈ సినిమాకి సంబంధించిన గ్రాఫిక్స్ వర్క్ ఇంకా పూర్తి కాలేదట. హడావిడిగా కానిచ్చేస్తే క్వాలిటీ ఉండదనే ఉద్దేశంతో, ఈ విడుదల తేదీని వాయిదా వేస్తున్నట్టుగా తెలుస్తోంది.

ఫలితంగా వేసవి రేసులో వున్నానని చెప్పిన టాక్సీ వాలా వాయిదాలతో టాక్సీ నెట్టుకుంటూ వస్తున్నాడు. గ్రాఫిక్స్ వర్క్ పూర్తయిన తరువాతనే రిలీజ్ డేట్ ను ప్రకటించాలనే నిర్ణయానికి చిత్ర నిర్మాణ సంస్థ వచ్చిందని టాక్. టాక్సీ డ్రైవర్ కి .. ఒక దెయ్యానికి మధ్య నడిచే అసక్తికరమైన కథ ఇది. అందువలన చిన్నపిల్లల నుంచి పెద్దల వరకూ అంతా ఈ సినిమాను చూడవచ్చని అంటున్నారు. ఈ సినిమాలో విజయ్ దేవరకొండ సరసన మాళవిక నాయర్ .. ప్రియాంక జవాల్కర్ నటించిన సంగతి తెలిసిందే