స్త్రీలే గాజులు ఎందుకు ధరించాలి? దానివెనుక ఆంతర్యం ఏమీ?

Posted: 05/08/2015 07:52 PM IST

స్త్రీలు తమ చేతులకు వేసుకునే గాజులు వారిని మరింత అందంగా మలిచేలా చేస్తాయి. చాలావరకు గాజులు అందం కోసమే స్త్రీలు వేసుకుంటారని అనుకుంటారు.. కానీ అలా అనుకోవడం పొరబాటే! గాజులు..స్త్రీకి రక్షాకంకణం వంటిది. ఈ గాజులు ధరించడం వెనుక సాంప్రదాయబద్ధమైన ఎన్నో ప్రయోజనాలు దాగివున్నాయి. అప్పుడే పుట్టిన పసిబిడ్డలకు దిష్టి తగలకుండా ఉండడానికి నల్లగాజులు వేస్తారు. ఇక అక్కడి నుంచి ఇలా ప్రారంభమైన గాజుల ప్రస్థానం.. జీవితం చివరి వరకూ కొనసాగుతూనే ఉంటుంది.

ప్రాచీనకాలంలో స్త్రీ, పురుష భేదం లేకుండా అందరూ గాజులు ధరించేవారు. అయితే.. కాలక్రమంలో పురుషులు వీటిని ధరించడం మానేయగా.. స్త్రీలు అలాగే కొనసాగిస్తూ వచ్చారు. స్త్రీలు గాజులు ధరించడం వల్ల వారికి తెలియకుండానే వారి నడకలో ఒక లాలిత్యం, లయ ఏర్పడుతుంది. ముఖ్యంగా ఆడపిల్లలకు చాలా చిన్నతనంనుంచే ఈ గాజుల వాడకాన్ని అలవాటు చేస్తారు. ‘జీవితం చాలా విలువైనది.. ఏమాత్రం అజాగ్రత్తగా ఉన్నా.. గాజులాగే పగిలిపోతుంది’ అనే జీవన సత్యాన్ని చిన్నతనం నుంచే తెలిసేలా చెయ్యడం కోసమే.. ఆడపిల్లలకు ఈ గాజులు ధరింపజేసే ఆచారాన్ని అలవాటు చేశారు.

అయితే.. ‘ఆడపిల్లకే ఈ జాగ్రత్త అవసరమా.. మగవాడికి అవసరం లేదా’ అనే సందేహం ఆధునిక స్త్రీలకు కలగడం తప్పు కాదు. కానీ.. ప్రాచీనకాలం నుంచీ, నేటి వరకూ.. స్త్రీని ‘గృహలక్ష్మి’ అని గౌరవించారేగానీ.. పురుషుని ‘గృహవిష్ణువు’ అని గౌరవించిన దాఖలాలు ఎక్కడా లేవు. అలాగే మగవాడు దుబారా మనిషి అయినా.. ఆ ఇంటి ఆడది జాగ్రత్తపరురాలైతే ఆ ఇంట్లో ఏ లోటు ఉండదు. అందుకే చిన్నతనం నుంచీ ఆడపిల్లకు జాగ్రత్త అలవాటు చెయ్యడం కోసమే.. గాజులు వేసేవారు.

గాజులు అందానికే కాదు.. సౌభాగ్యానికి కూడా చిహ్నం. గాజులు రంగును బట్టి రకరకాల అర్థాలను తెలియచేస్తాయి. ఎరుపురంగు గాజులు శక్తిని, నీలంరంగు గాజులు విజ్ఞానాన్ని, ఊదారంగు గాజులు స్వేచ్ఛను, ఆకుపచ్చరంగు గాజులు అదృష్టాన్ని, పసుపురంగు గాజులు సంతోషాన్ని, నారింజరంగు గాజులు విజయాన్ని, తెల్లరంగు గాజులు ప్రశాంతతను, నలుపురంగు గాజులు అధికారాన్ని, వెండి గాజులు బలాన్ని, బంగారు గాజులు ఐశ్వర్యాన్ని సూచిస్తాయి.