Posted: 02/02/2013 12:58 PM IST

మహిళల ప్రపంచకప్ లో అద్బుతాలు ఆవిష్ర్కుతం అవుతున్నాయి. ప్రపంచకప్ లీగ్ మ్యాచ్ లో భాగంగా ఇంగ్లాండ్ శ్రీలంక మధ్యన జరిగిన మ్యాచ్ తీవ్ర ఉత్కంఠ రేపింది. ఎప్పుడు ఇంగ్లాండ్ వాళ్ళను ఓడించని శ్రీలంక వరల్డ్ కప్ తొలి మ్యాచ్ లో గెలిచి షాక్ ఇచ్చారు. డిఫెండింగ్ చాంపియన్ ఇంగ్లండ్‌ను ఆఖరి బంతికి ఓడించారు. శుక్రవారం బ్రబౌర్న్ స్టేడియంలో చివరి బంతి వరకూ ఉత్కంఠభరితంగా సాగిన గ్రూప్ ఎ మ్యాచ్‌లో ఒక్క వికెట్ తేడాతో నెగ్గి శ్రీలంక ఊపిరి పీల్చుకుంది. టాస్ గెలిచిన శ్రీలంక ఫీల్డింగ్ ఎంచుకోగా... ఇంగ్లండ్ 50 ఓవర్లలో 8 వికెట్ల నష్టానికి 238 పరుగులు మాత్రమే చేసింది. గున్ (71 బంతుల్లో 52; 4 ఫోర్లు) టాప్ స్కోరర్. బ్రిండెల్ (31), నైట్ (38), జోన్స్ (41) రాణించారు. కౌసల్య, సిరివర్ధనే, సెనెవిరత్న రెండేసి వికెట్లు తీసుకున్నారు.

శ్రీలంక జట్టు 50 ఓవర్లలో 9 వికెట్ల నష్టానికి 244 పరుగులు చేసి గెలిచింది. జయాంగని (72 బంతుల్లో 62; 7 ఫోర్లు, 1 సిక్సర్)తో పాటు యశోద మెండిస్ (46), సిరివర్ధనే (34) రాణించడంతో ఓ దశలో లంక లక్ష్యం దిశగా సాగింది. కానీ ఇంగ్లండ్ బౌలర్లు పుంజుకుని వరుస విరామాల్లో వికెట్లు తీసి మ్యాచ్‌పై పట్టు బిగించారు. కౌసల్య (41 బంతుల్లో 56; 5 ఫోర్లు, 3 సిక్సర్లు) ఒక ఎండ్‌లో నిలకడగా ఆడి మ్యాచ్‌ను మలుపు తిప్పింది. ఇంగ్లండ్ బౌలర్లలో బ్రంట్, ఎల్విస్, బ్రిండెల్ రెండేసి వికెట్లు తీసుకున్నారు. సంచలన ఆల్‌రౌండ్ ప్రదర్శన కనబరచిన శ్రీలంక క్రికెటర్ కౌసల్యకే ప్లేయర్ ఆఫ్ ద మ్యాచ్ అవార్డు లభించింది.