విమర్శలోచ్చినా తీరు మార్చుకోని బంగ్లా ఫాన్స్

Posted: 06/14/2017 10:01 PM IST

ఐసీసీ ఛాంపియన్స్‌ ట్రోఫీలో భాగంగా సెమీస్ లో భారత్‌-బంగ్లాదేశ్ పోరుకు ఇంకా కాస్త సమయం ఉన్నా బంగ్లా క్రికెట్ అభిమానులు మాత్రం అప్పుడే వేడిని రగుల్చుతూ విమర్శలను ఎదుర్కొంటున్నారు. సోషల్ మీడియా వేదికగా ఇరు దేశాల మధ్య సాగుతున్న ఈ యుద్దంలో బంగ్లాదేశ్ అభిమానులు గతంలో మాదిరిగానే ఈ సారి కూడా విమర్శల పాలవుతున్నారు. ఇరు దేశాల అభిమానుల మధ్య అప్పుడే మాటల యుద్ధం మొదలైంది. లీగ్ లో వర్షం కారణంగా మ్యాచ్‌లు రద్దవ్వడం కలిసొచ్చిన బంగ్లా... ఆ తర్వాత న్యూజిలాండ్ తో జరిగిన మ్యాచ్ లో అనూహ్యంగా విజయం సాధించి సెమీఫైనల్‌కి అర్హత సాధించింది. టోర్నీలో రెండో సెమీఫైనల్లో బంగ్లాదేశ్‌... భారత్‌తో తలపడనుంది.

ఈ నేపథ్యంలో భారత్‌-బంగ్లా పోరుపై సోషల్ మీడియాలో అభిమానుల మధ్య వార్‌ మొదలైంది. తమ అభిమాన జట్టుకు మద్దతిస్తూ పలువురు పోస్టులు, ఫొటోలు పంచుకుంటున్నారు. బంగ్లా అభిమానులు మాత్రం భారత్‌ను అవమానిస్తూ అభ్యంతకర ట్వీట్లు చేస్తున్నారు. గతంలోనూ ఓసారి భారత్‌-బంగ్లా పోరు సమయంలో ఇలాంటిదే చోటు చేసుకుంది. భారత్ నుంచే కాక ప్రపంచ నలుదిశల నుంచి బంగ్లా అభిమానులు తీవ్ర విమర్శలను ఎదుర్కోవాల్సి వచ్చింది.

అయినా తన ధోరణి మార్చుకోని బంగ్లాదేశ్ అభిమానులు మరోమారు అలాంటి చౌకబారు ప్రచారానికే తెరతీశారు. తాజాగా బంగ్లాదేశ్ కి చెందిన ఓ అభిమాని సోషల్ మీడియాలో పంచుకున్న ఫొటో ఇప్పుడు నెట్టింట్లో వైరల్ గా మారింది. శునకాన్ని వేటాడుతున్న పులి చిత్రాన్ని తీసుకుని... బంగ్లాదేశ్ జాతీయ పతాకాన్ని పులిపై, భారత పతాకాన్ని శునకంపై ఉంచాడు. ‘సోదురుడా, ఇదో మంచి పోరు కానుంది’ అని క్యాప్షన్ కూడా తగిలించాడు. దీనిపై పలువురు తీవ్ర అభ్యంతకరం వ్యక్తం చేశారు.