దక్షిణాప్రికాపై ఉమేశ్ యాదవ్ రాణించగలడా.?

Posted: 09/27/2019 09:42 PM IST

దక్షిణాఫ్రికాతో టెస్టు సిరీస్‌కి ఫాస్ట్ బౌలర్ జస్‌ప్రీత్ బుమ్రా స్థానంలో ఎంపికైన ఉమేశ్ యాదవ్.. విజయనగరం వేదికగా జరుగుతున్న మూడు రోజుల ప్రాక్టీస్ మ్యాచ్‌లో తేలిపోయాడు. బోర్డ్ ప్రెసిడెంట్‌ ఎలెవన్, దక్షిణాఫ్రికా మధ్య ఈ మ్యాచ్ జరుగుతుండగా.. రెండో రోజైన శుక్రవారం సఫారీ బ్యాట్స్‌మెన్‌లకి మంచి ప్రాక్టీస్ లభించింది. తొలిరోజైన గురువారం వర్షం కారణంగా ఆట రద్దయిన విషయం తెలిసిందే.

మ్యాచ్‌లో టాస్ గెలిచిన దక్షిణాఫ్రికా బ్యాటింగ్ ఎంచుకుంది. దీంతో.. ఓపెనర్ డీన్ ఎల్గర్ (6)తో కలిసి ఇన్నింగ్స్ ఆరంభించిన కెప్టెన్ మర్‌క్రమ్ (100 రిటైర్డ్ హర్ట్: 118 బంతుల్లో 18x4, 2x6) శతకంతో చెలరేగాడు. దీంతో.. ఈరోజు వర్షంతో ఆట ముగిసే సమయానికి దక్షిణాఫ్రికా 199/4తో నిలిచింది. బోర్డ్ ప్రెసిడెంట్‌ ఎలెవన్ టీమ్ బౌలర్లలో ధర్మేంద్ర సిన్హా జడేజా రెండు వికెట్లు పడగొట్టగా.. ఉమేశ్, ఇషాన్ పోరెల్ తలో వికెట్ తీశారు.

రెండు రోజుల క్రితం జస్‌ప్రీత్ బుమ్రా గాయపడటంతో అతడి స్థానంలో ఉమేశ్ యాదవ్‌ని టెస్టు జట్టులోకి సెలక్టర్లు ఎంపిక చేశారు. విశాఖపట్నం వేదికగా అక్టోబరు 2 నుంచి తొలి టెస్టు మ్యాచ్ ప్రారంభంకానుండగా.. ఈ మ్యాచ్‌కి ముందు ప్రాక్టీస్ కల్పించే ఉద్దేశంతో ఉమేశ్‌ని ఆడించగా.. 10 ఓవర్లు బౌలింగ్ చేసిన ఉమేశ్ ఆరంభంలో రెండు మూడు ఓవర్లు మినహా ప్రభావం చూపలేకపోయాడు.