బుల్లితెరపై చిందులేయనున్న సైనా నెహ్వాల్

Posted: 09/14/2015 06:59 PM IST

Saina nehwal special role har ghar kuch kehtha hai tv serial

క్రీడారంగంలో అద్భుతంగా రాణిస్తున్న కొందరు క్రీడాకారులు సినీపరిశ్రమ, బుల్లితెరల వైపు తమ దృష్టి సారిస్తున్నారు. ఇప్పటికే ఎందరో తమ అదృష్టాన్ని ఆ రెండు రంగాల్లో పరీక్షించుకున్నారు. ఇప్పుడు ఈ జాబితాలో తాజాగా సైనా నెహ్వాల్ కూడా చేరిపోయింది. బ్యాడ్మింటన్ లో అద్భుతంగా రాణిస్తున్న ఈ అమ్మడు.. త్వరలోనే బుల్లితెరపై కనువిందు చేయనుంది. ఇన్నాళ్లూ తన బ్యాడ్మింటన్ బ్యాట్ తో ప్రత్యర్థులను ముచ్చెమటలు పట్టించి ఎందరో క్రీడాభిమానుల్ని సొంతం చేసుకున్న ఈమె.. ఇప్పుడు నటనవైపు అడుగులు వేసి అందరినీ ఆకర్షిస్తోంది.

హిందీలో ‘హర్ ఘర్ కుఛ్ కెహతా హై’ పేరిట ఓ సీరియల్ తెరకెక్కుతోంది. ఈ సీరియల్ లోనే సైనా నెహ్వాల్ నటిస్తోంది. ఇందులో ఈమెతోపాటు బాలీవుడ్ హాస్యనటుడు వినయ్ పాఠక్ కూడా నటిస్తున్నారు. ఈ విషయాన్ని అమ్మడు తన ట్విటర్ లో వెల్లడించింది. అంతేకాదు.. షూటింగ్ సందర్భంగా తీసిన కొన్ని ఫోటోలను కూడా పోస్ట్ చేసింది. త్వరలోనే ఈ సీరియల్ బుల్లితెర ప్రేక్షకుల ముందుకు రానుంది. అయితే.. సైనా నెహ్వాల్ ఈ సీరియల్ లో ప్రత్యేక పాత్రలో నటిస్తోందా..? లేక కేవలం రెండు మూడు ఎపిసోడ్లకు గెస్ట్ పాత్రలో నటిస్తోందా? అన్న విషయమై ఇంకా క్లారిటీ రాలేదు. ఆ సందేహం కాస్త పక్కన పెడితే.. ఈ సీరియల్ లో నటించేందుకు అవకాశం వచ్చినందుకు అమ్మడు ఉబ్బితబ్బిబ్బవుతోందని సన్నిహిత వర్గాలు పేర్కొంటాయి.

ఇదిలావుండగా.. గతంలో ఓ సందర్భంలో తనకు నటన అంటే చాలా ఇష్టమని సైనా నెహ్వాల్ పేర్కొంది. కానీ.. తనకు బ్యాడ్మింటన్ మీదే ఎక్కువ దృష్టి అని పేర్కొంటూనే.. నటించే అవకాశమొస్తే, అందుకు వీలుంటే ఖచ్చితంగా నటిస్తానని తెలిపింది. ఇప్పుడు ఆ అవకాశం రావడంతో ఈమె సద్వినయోగం చేసుకుంటోందని సన్నిహిత వర్గాలు తెలిపాయి. ఏదేమైనా.. తెరమీద కనిపించాలనే ఆమె కోరిక బుల్లితెర ద్వారా తీరనుందని చెప్పుకుంటున్నారు.