మస్తు మస్తు మాటల కేసీఆర్

Posted: 10/05/2015 08:43 AM IST

కేసీఆర్ అంటే కేరాఫ్ మాటలు కేరాఫ్ పంచులు కేరాఫ్ వెటకారం ఇంకేమైనా ఉంటే అవి కూడా కేసీఆర్ కు బాగా సూటవుతాయి. గాల్లో మాటలు చెప్పడం.. చేతల్లో మాత్రం చుక్కలు చూపించడం తెలంగాణ ముఖ్యమంత్రి కేసీఆర్ కు బాగా అలవాటు. మాటలతో కాలం వెల్లదియ్యడంలో కేసీఆర్ ను మించిన వారు ఎవరూ ఉండరేమో. తెలంగాణ రాష్ట్రం ఏర్పడ్డ తర్వాత అలా చేస్తాం.. ఇలా చేస్తాం అంటూ అరచేతిలో ఆకాశంలోని చుక్కలు చూపించారు తెలంగాణ ముఖ్యమంత్రి. సెక్రటేరియట్ ను అలా చేస్తాం.. హైదరాబాద్ ను ఇలా చే్స్తామంటూ రోజుకో బ్లూప్రింట్ తియ్యడం దాని మీడియా ముందు గొప్పగా చెప్పడం తర్వాత దాన్ని అటకెక్కించడం శరామామూలైపోయింది.

తాజాగా కేసీఆర్ నర్సన్న పేట గ్రామాన్ని దత్తత తీసుకున్నారు. అక్కడికి వెళ్లి రైతులతో, గ్రామస్తులతో గ్రామ సభను ఏర్పాటు చేశారు. వారికి ప్రభుత్వం తరఫున అందించే సహాకారం, వర్తించే పథకాలు ఇలా అన్నింటి మీదా ఓ డెమో నిర్వహించారు. అసలే కేసీఆర్ సారు.. అందునా గ్రామాన్ని దత్తత తీసుకుంటే ఎలా ఉంటుంది. అందుకే చిగురించిన ఆశలతొ కేసీఆర్ చెప్పినదానికల్లా ఊ కొట్టారు గ్రామస్తులు. అయితే గతంలో చెప్పిన మాటల్లాగా కాకుండా కేసీఆర్ ఎంతో ప్రతిష్టాత్మకంగా గ్రామాన్ని దత్తత తీసుకున్నారని.. ఖచ్చితంగా రానున్న నాలుగైదు నెలల్లో గ్రామ రూపురేఖలు మారతాయని అధికారులు ఆశాభావం వ్యక్తం చేస్తున్నారు. మరి కనీసం ఈ సారికైనా మాటలు కట్టిపెట్టి మేలు చేస్తారా అన్నది చూడాలి.