తెలంగాణ ఎంసెట్ 2 రద్దుకు ప్రభుత్వం మొగ్గు..

Posted: 07/28/2016 07:14 AM IST

వైద్య విద్య సహా దాని అనుబంధ కోర్సుల ప్రవేశాల కోసం తెలంగాణ ప్రభుత్వం నిర్వహించిన ఎంసెట్ 2 లీక్ అయ్యిందని పక్క ఆధారాలు లభ్యం కావడంతో ఇక ఆ పరీక్షను రద్దు చేయాలని ప్రభుత్వం యోచిస్తున్నట్లు సమాచారం. ఈ మేరకు ఇవాళ అధికారికంగా ప్రభుత్వం తమ నిర్ణయాన్ని ప్రకటించే అవకాశం వున్నట్లు తెలుస్తుంది. ముందునుంచి పేపర్ లీక్ పై వార్తలు వస్తున్నా.. సిఐడీ విచారణ జరుపుతుంది కాబట్టి.. ఆ దర్యాప్తు సంస్థ నివేదిక అందిన తరువాతే నిర్ణయం తీసుకోవాలని భావించిన ప్రభుత్వం ఇప్పుడు ఈ మేరకు నిర్ణయం తీసుకోనుంది.

ఇప్పటికీ ఎంసెట్ రద్దు చేసే యోచనలో ప్రభుత్వం వున్నట్లు తెలంగాణ మంత్రి లక్ష్మారెడ్డి కూడా సంకేతాలు ఇచ్చారు. ప్రభుత్వ నిబంధనల ప్రకారం చూస్తే ఎంసెట్ 2 పరీక్షను రద్దు చేయాల్సిన పరిస్థితి ఉత్పన్నమవుతుందని వ్యాఖ్యానించారు. అయితే విద్యార్థుల కోసం ఎంసెట్ 3 పరీక్షను నిర్వహించాల్సి వుందని కూడా ఆయన అన్నారు. ముఖ్యమంత్రి ప్రత్యేక కార్యదర్శి రాజశేఖరరెడ్డితో ప్రత్యేకంగా సమావేశమైన తరువాత హెల్త్‌ యూనివర్సిటీ ఉపాధ్యక్షుడు డాక్టర్‌ కరుణాకర్‌రెడ్డితో కూడా ప్రత్యేకంగా సమావేశాన్ని నిర్వహించిన అనంతరం ఆయన ఈ వ్యాఖ్యలు చేశారు.

ఈ సందర్భంగా మీడియాతో మాట్లాడుతూ.. ఎంసెట్‌-2పై త్వరలో నిర్ణయం తీసుకుంటామని, సీఎం కేసీఆర్‌తో మాట్లాడిన తర్వాత తుది నిర్ణయాన్ని ప్రకటిస్తామని వెల్లడించారు. అయితే ఎంసెట్‌-2 పేపర్‌ లీకేజీపై స్పష్టమైన ఆధారాలు లభించడంతో పరీక్షను రద్దు చేయడం మినహా మరో మార్గం లేదనే ఆలోచనతో ప్రభుత్వం ఉన్నట్లు సమాచారం. దీంతో ఎంసెట్‌-3 కోసం ప్రత్యేకంగా మళ్లీ నోటిఫికేషనను జారీచేసే అవకాశం ఉంది.