Posted: 11/20/2012 01:31 PM IST

కాంగ్రెస్ పార్టీలో గ్రూప్ రాజకీయాలతో సతమతమవుతున్న సమయంలో తెరపైకి లేఖ లొల్లి బయటపడింది. ఇప్పుడు కాంగ్రెస్ నాయకుల్లో లేఖ లొల్లి ఎక్కువుగా కనిపిస్తుంది. కాంగ్రెస్ నాయకుల కుమ్ములాట వలన అధిష్టానానికి పెద్ద తలనొప్పిగా మారింది. కాంగ్రెస్ పార్టీలో మరోసారి నాయకత్వ మార్పు డిమాండ్ తెరపైకి వచ్చింది. ఇంత కాలం ఆ డిమాండ్ ను కేవలం రాష్ట్ర రాజకీయ నేతలు మాత్రమే చేసేవారు. తాజాగా అధిష్ఠానం పెద్దలకు సన్నిహితంగా ఉండ కేంద్ర మంత్రి కిషోర్ చంద్రదేవ్ పీసీసీ చీఫ్, సీఎంపై సోనియాకు లేఖ ద్వారా ఫిర్యాదు చేశారు. వెంటనే వారిద్దరిని తొలగించాలని కోరారు.చంద్రదేవ్ తాజాగా లేఖ రాయలేదని, లేఖలోని అంశాలు చూస్తే చాలా కాలం క్రితమే రాసారిని నేతలన్నారు. ఒకవేళ లేఖ ఇప్పుడు రాయకున్నా.. దాన్ని ఇప్పుడు ఎందుకు బహిర్గతం చేసారనేది ఆసక్తిగా మారింది. కొన్నాళ్లుగా రాష్ట్ర నాయకత్వంలో మార్పు ఉంటుందని ఊహగానాలు బలంగా వినిపిస్తున్నాయి. రాష్ట్ర కాంగ్రెస్ వ్యవహారాల ఇంచార్జీ కొట్టిపారేసినా.. ఎవరూ పెద్దగా పట్టించుకోలేదు. ఎప్పటిలాగే నాయకత్వం మార్పు ఖాయమని చెబుతోన్న నేతలు మరోసారి తమ వాదనను తెరమీదకి తెస్తున్నారు. ఇలాంటి సమయంలో కిషోర్ లేఖ బహిర్గతం కావడంతో వారు తమ వాదనను మరింత గట్టిగా వినిపిస్తున్నారు. చంద్రదేవ్ లేఖ పిసిసి అధ్యక్షుడు బొత్సను మాత్రం కంగారు పుట్టించింది. లేఖ విషయాన్ని మీడియా ఆయన దగ్గర ప్రస్తావించగానే రుసరుసలాడారు. మీడియాపై కోర్టుకు వెళ్తానని చెబుతున్న కిషోర్ చంద్రదేవ్ లాంటి వారు ఇలాంటి పనులు చేస్తారనే అనుమానం వ్యక్తం చేశారు. పార్టీ అద్యక్ష పదవి కోసం పైరవీ చేయలేదని.. నామినేటెడ్ అద్యక్షుడైన తనను హైకమాండ్ ఆదేశిస్తే దిగిపోవడానికి సిద్దంగా ఉన్నాని చెప్పుకొచ్చారు.అయితే చంద్రదేవ్ లేఖపై సీరియస్ గా స్పందిస్తే సీఎం వర్గీయులు మాత్రం మౌనంగా గమనిస్తున్నారు. చంద్రదేవ్ లేఖ పార్టీలో వేడి రగిలించడంతో బొత్స త్వరలోనే ఢిల్లీకి వెళ్లేందుకు సిద్ధమయ్యారు.