Posted: 11/21/2012 12:47 PM IST

అవిశ్వాసం పేరిట యూపీఏను ఇరకాటంలో పెట్టాలనుకున్న తృణమూల్ కాంగ్రెస్ అధినేత్రి మమత వ్యూహం ఫలించే సూచనలు కనిపించడం లేదు. ఆదుకోవాల్సిన, నమ్ముకున్న పార్టీలు ఒక్కొక్కటిగా దూరం కావడంతో మమత ఏకాకిగా మిగిలే పరిస్థితులు కనిపిస్తున్నాయి. చివరికి తన చిరకాల ప్రత్యర్థులతో సైతం చేతులు కలిపి పరువు కాపాడుకునే యత్నంలో పశ్చిమ బెంగాల్ ముఖ్యమంత్రి నిమగ్నమైనట్టు కనిపిస్తోంది. తాను పెట్టదలచుకున్న అవిశ్వాసానికి మద్దతు కొరవడటంతో సిపిఎం ప్రవేశ పెట్టదలచిన తీర్మానానికి మద్దతిచ్చేందుకు మమత ముందుకొస్తున్నట్టు సంకేతాలు అందుతున్నాయి. యూపీఏ సంకీర్ణ ప్రభుత్వంపై అవిశ్వాసాన్ని ప్రతిపాదించటం ద్వారా జాతీయస్థాయిలో ప్రతిపక్ష రాజకీయాలకు కేంద్ర బిందువు కావాలనుకున్న మమత ప్రయత్నాలు పూర్తిగా విఫలమైనట్టే కనిపిస్తోంది. తృణమూల్ ప్రతిపాదించే అవిశ్వాస తీర్మానానికి మద్దతిచ్చేందుకు బిజెపి సహా విపక్షాలన్నీ అయిష్టత వ్యక్తం చేయటంతో అవాక్కైన మమత, చివరకు సిపిఎం మద్దతుకూ సిద్ధమయ్యారు. సంకీర్ణ ప్రభుత్వంపై తాము ప్రతిపాదించే అవిశ్వాస తీర్మానానికి మద్దతివ్వటం ఇష్టంలేని పక్షంలో సిపిఎం ప్రతిపాదించే అవిశ్వాస తీర్మానానికీ మద్దతిచ్చేందుకు సిద్ధమేనని తాజాగా ప్రకటించారు. అయితే వామపక్షాలు ముఖ్యంగా సిపిఎం మాత్రం మమతా బెనర్జీ ప్రతిపాదనను అంగీకరించేందుకు ససేమిరా అంటోంది. కొత్త రాష్టప్రతి ఎన్నిక సమయంలో తృణమూల్ వ్యవహరించిన తీరుపట్ల బిజెపి ఆగ్రహంతో ఉండటం తెలిసిందే. ఇతర విపక్షాలు కూడా మమత వ్యవహరించే తీరుపట్ల అనుమానాలు వ్యక్తం చేస్తునాయి.