Posted: 12/26/2012 09:37 AM IST

డిసెంబర్ 21 యుగాంతం వస్తుంది ఆ రోజున ప్రపంచం అంతా అంతం అయి పోతుంది అని యావత్ ప్రపంచంతో పాటు,  మన రాష్ట్రనాయకులు కూడా భయపడ్డారు. కానీ యుగాంతం గండం గడవటంతో ప్రజలు ఊపిరి పీల్చుకున్నారు. కానీ  మన రాష్ట్ర నాయకులకు డిసెంబర్ 21 గండం తప్పినా, డిసెంబర్ 28 గండం మాత్రం తప్పేట్లుగా కనబడటం లేదు. ఆ రోజు ఏమౌతుంది వీరికి అనుకుంటున్నారా ? అదేనండి ప్రత్యేక రాష్ట్ర అంశం పై కేంద్ర హోంశాఖ అన్ని పార్టీలతో అఖిలపక్ష సమావేశం నిర్వహించబోతున్న విషయం తెలిసిందే. ఈ అఖిల పక్ష సమావేశానికి కొన్ని కొద్ది గంటలు మాత్రమే మిగిలి వుంది. దీంతో రాజకీయ నాయకుల గుండెల్లో దడ దడ మొదలైంది. సమయం గడుస్తున్న కొద్ది పార్టీల్లో వేడి పుడుతుంది. ఇక ఈ సమావేశంలో అధికార పార్టీ కాంగ్రెస్ వైఖరి ముందు చెప్పాలని అన్ని పార్టీలు డిమాండ్ చేస్తున్నాయి. కానీ కాంగ్రెస్ మాత్రం ముందుగా అన్ని పార్టీల వైఖరి విన్నతరువాత తన అభిప్రాయాన్ని వెల్లడించాలని అనుకుంది.

ఇక అఖిల పక్ష సమావేశంలో టీఆర్ఎస్, బీజేపీ పార్టీలు తెలంగాణకు అనుకూలంగా నిర్ణయం చెప్పడానికి సిద్ధం అవ్వగా, మజ్లిస్, సీపీఎం పార్టీలు తన పాత అభిప్రాయాన్నే మరోసారి వినిపించడానికి సిద్ధం అయ్యాయి. ఇక తెలుగు దేశం పార్టీ, వైయస్సార్ కాంగ్రెస్ పార్టీలు ఏ నిర్ణయం చెప్పాలో తర్జన భర్జన పడుతున్నాయి. అఖిల పక్షంలో ఏ నిర్ణయం చెప్పాలనే దాని పై చంద్రబాబు టి. తెదేపా ఎమ్మెల్యేలతో చర్చలు జరిపారు. ఇటు సీమాంధ్ర ఎమ్మెల్యేలతో కూడా ఇవాళ చర్చలు జరపనున్నారు. ఇక టి.కాంగ్రెస్ ఎమ్మెల్యేలు కూడా ఈనెల 28 తరువాత పార్టీ చెప్పే నిర్ణయం తరువాత తదుపరి కార్యాచరణను ఖరారు అవకాశం కనిపిస్తుంది. మొత్తం మీద అఖిలపక్ష సమావేశం కాంగ్రెస్‌ నాయకత్వానికి ఇబ్బందికర పరిస్థితినే సృష్టించే అవకాశాలున్నాయని పార్టీ వర్గాలు అంగీకరిస్తున్నాయి. మరి ఈ నెల 28 తరువాత రాష్ట్ర రాజకీయాలు ఏ విధంగా మారుతాయో చూడాలి అంటున్నారు రాజకీయ విశ్లేషకులు.