Posted: 03/22/2013 08:22 PM IST

వైయస్సార్ కాంగ్రెస్ పార్టీ  అధ్యక్షుడు , కడప జిల్లా పార్లమెంటు సభ్యుడు వైయస్ జగన్ మోహన్ రెడ్డి కి సంబంధించిన అక్రమాస్తుల కేసులో కీలక మలుపు చోటు చేసుకుంది. వైయస్ రాజశేఖర్ రెడ్డికి ఆత్మ బంధువు అయిన మాజీ రాజ్యసభ సభ్యుడు కేవీపీ రామచంద్రారావు కు సీబీఐ నోటీసులు జారీ చేసింది. నిన్న కేవీపీ పాత్ర పై వివరాలను రాష్ట్రప్రభుత్వాన్ని అడిగిన సీబీఐ ఆయనకు ఈ రోజు ఉదయం నోటీసులు జారీ చేసింది. రేపు(శనివారం) 10 గంటలకు సీబీఐ ఎదుట హాజరుకావాల్సిందిగా కేవీపీకి సీబీఐ ఆదేశాలు జారీ చేసింది. రాజశేఖర్ రెడ్డి హయాంలో కేవీపీ చక్రం వెనుకుండి చక్రం తిప్పాడనే ఆరోపణలు ఉన్నవిషయం తెలిసిందే.

ఈ నేపథ్యంలో జగన్ ఆస్తుల కేసులో కెవిపి రామచంద్ర రావుకు సిబిఐ నోటీసులు జారీ చేయడం ప్రాధాన్యత సంతరించుకుంది. ప్రధాన ప్రతిపక్షం తెలుగుదేశం పార్టీతో పాటు నిజామాబాద్ పార్లమెంటు సభ్యుడు మధుయాష్కీ తదితరులు జగన్ ఆస్తుల కేసులో కెవిపిని విచారించాలని డిమాండ్ చేస్తున్న విషయం తెలిసిందే. ఇక దీని పై స్పందించిన కేవీపీ అక్రమాస్తుల కేసులో భాగంగానే నోటీసులు జారీ చేశారని, సీబీఐ విచారణ పూర్తిగా సహకరిస్తానని ఆయన చెప్పాడు. ఇప్పటికే ఈ కేసులో మూడు ఛార్జిషీట్లు ధాఖలు చేసిన సీబీఐ నాలుగో ఛార్జ్ షీటు దాఖలు చేయనున్న నేపథ్యంలో ఈయనకు నోటీసులు పంపండం, విచారణకు హాజరు కమ్మనడం ప్రాధాన్యత సంతరించుకుంది. రేపు విచారణ అనంతరం కేవీపీని కూడా అరెస్టు చేస్తారా ? లేక విచారణతోనే సరిపెడతారా అనేది చూడాలి.