విండీస్ ని నిలువరించేనా ?

Posted: 07/05/2013 08:14 PM IST

భారత జట్టు విదేశీ గడ్డ పై అడుగు పెడుతుందంటే... కాస్తంత ఆందోళనే. కానీ మొన్నటి వరకు ఇంగ్లాండులో జరిగిన ఛాంపియన్స్ ట్రోఫీ లో ఆట తీరును చూస్తే... ముక్కోణపు సిరీస్ ని ఈజీగా కొడుతుందని అనుకున్నారు. అది గాక అందులో తలపడిన జట్లే కాబట్టి భయపడాల్సిన అవసరం లేదని అనుకున్నారు. కానీ విండీస్ లో అడుగు పెట్టాక తెలిసింది మనోళ్ళకు. ఆడిన రెండు మ్యాచ్ ల్లో ఓడి టైటిల్ సాధించడం కాదుకదా ఫైనల్ చేరితే గగనమే అనుకునే స్టేజికి వచ్చారు. దీంతో మిగిలిన రెండు లీగ్ మ్యాచ్ ల్లో గెలవాల్సిన పరిస్థితి తెచ్చుకుంది. తొలి మ్యాచ్‌లో విండీస్‌పై ఓ మేరకు బాగానే ఆడినా... శ్రీలంకతో జరిగిన మ్యాచ్‌లో మాత్రం దారుణంగా చేతులెత్తేసింది. ఇటీవలి ఆటతీరుతో ప్రత్యర్థుల ప్రశంసలు సైతం అందుకున్న భారత్ హఠాత్తుగా సత్తా చూపలేని జట్టుగా మారింది. ఈ పరిస్థితుల్లో నేడు (శుక్రవారం) ఆతిథ్య వెస్టిండీస్‌తో మరో మ్యాచ్‌కు సిద్ధమైంది. భవిష్యత్ కెప్టెన్‌గా పేరు తెచ్చుకున్న కోహ్లి తన శక్తిసామర్థ్యాలు ఎలాంటివో చాటుకోవాల్సి ఉంది. పూర్తి స్థాయి కెప్టెన్‌గా బరిలోకి దిగిన లంక మ్యాచ్‌లో కూడా అతని ప్రణాళికలు ప్రభావం చూపలేకపోయాయి.

ఇలాంటి పరిస్థితిలో నేటి మ్యాచ్‌లో యువ జట్టును ఎలా నడిపిస్తాడనేది ఆసక్తికరంగా మారింది. ఒక ఈ సిరీస్ లో జడేజా మినహా కింది స్థాయిలో ఎవరూ రాణించలేకపోతున్నారు. శిఖర్ ధావన్ రెండు మ్యాచ్‌ల్లోనూ విఫలమయ్యాడు. ఓపెనర్లు ఐదు ఓవర్లను మించి ఆడలేకపోయారు. కోహ్లి, కార్తీక్ కూడా విఫలమయ్యారు. ఓవరాల్‌గా బ్యాట్స్‌మెన్ పరిస్థితులకు తగ్గట్టు ఆటతీరు చూపాల్సి ఉంది. ఇక ఇప్పటికే రెండు మ్యాచ్ లు గెలిచి తన సొంత గడ్డలో తామే రారాజులం అని ధీమాగా ఉన్న విండీస్ జట్టు మంచి ఫాంలో ఉంది. నేటి మ్యాచ్‌లో భారత్ ఓడితే టోర్నీలో ఉండేందుకు ఇతర సమీకరణాలపై ఆధారపడాల్సి ఉంటుంది. ముందుగా ఆదివారం జరిగే తమ చివరి లీగ్ మ్యాచ్‌లో విండీస్ జట్టు ఐదు పాయింట్లతో ఉన్న శ్రీలంకను ఓడించాల్సి ఉంటుంది. అటు మంగళవారం జరిగే మ్యాచ్‌లో భారత జట్టు లంకను బోనస్ పాయింట్ సహాయంతో ఓడించి రన్‌రేట్‌ను మెరుగు పరుచుకోవాల్సి ఉంటుంది. అలాగైతే ఇరు జట్లు ఐదు పాయింట్లతోనే ఉన్నప్పటికీ మెరుగైన రన్‌రేట్ ఆధారంగా భారత్ తుది పోరుకు అర్హత సాధిస్తుంది. చూద్దాం మనవాళ్ల సత్తా ఏంటో ?