రాము వింతైన ఆహ్వానం

Posted: 08/14/2013 12:08 PM IST

ఎంతటివారైనా కూతురి పెళ్ళి వచ్చేసరికి పూర్తిగా మెత్తబడిపోతారని రామ్ గోపాల్ వర్మ ను చూస్తే మరోసారి అనిపిస్తుంది.  అణిగిమణిగి ఉండటం, పెళ్ళి కొడుకు తరఫువారి ఇష్టాలకు తలవొగ్గటం లాంటివన్నీ ఆచారంగా వస్తున్నందువలనే కాదు, కూతురు ఇల్లు విడిచి వెళ్ళిపోతుందన్న తండ్రి హృదయంలోని బాధ బయటకే కాదు తనకు తాను కూడా చెప్పుకోలేని, అర్థమే కాని విధంగా ఉంటుంది.  ఆ వ్యథకు స్పష్టత ఉండదు.  జరిగేది శుభకార్యమైనా బాధ ఎందుకు కలుగుతుందన్నదానికి నిర్వచనం చెప్పలేని స్థితి. 

రామ్ గోపాల్ వర్మ కూతురు రేవతి తన డాక్టర్ ప్రియుడు ప్రణవ్ తో ఆగస్ట్ 15 న మూడు ముళ్ళు వేయించుకుంటున్న సందర్భంగా వర్మ ఈ వేడుకను చిన్న పరిధిలో ఆర్భాటం లేకుండా చెయ్యదలచుకున్నా పెళ్ళనేసరికి పనులకు కొదవుండదు.  ఏమాత్రం బెట్టుకి పోకుండా, అల్లుడి కాళ్ళు కడగటంతో సహా సాంప్రదాయబద్ధంగా వస్తున్న అన్ని ఆచారాలనూ పాటించటానికి వర్మ అంగీకరించారట. 

ఇంతకీ వింతైన అహ్వానం ఏమిటంటే, పెళ్ళి పెద్దెత్తున చెయ్యకపోయినా అందరికీ తెలియజేయటం విధి కనుక, రామ్ గోపాల్ వర్మ అందరినీ ఈవిధంగా ఆహ్వానించారు. 

ఆగస్ట్ 15 న సాయంత్రం 8.45కి జరుగుతున్న నా కూతురు వివాహం నాకు తప్పించుకోలేని ఒక బాధ్యత.  రాదలచుకుంటే తప్పక రండి కానీ దంపతులను ఆశీర్వదించటం కంటే నేనెంత జోకర్ లా కనిపిస్తానో చూడటానికి.

ఎప్పుడూ వివాదాలను కోరుకుంటున్నట్టుగా కనిపించే రామ్ గోపాల్ వర్మ తనలోని సున్నితమైన హాస్యాన్ని ఈ విధంగా ఆహ్వానానికి జోడించారు.

-శ్రీజ