కమిటీ పని ప్రారంభించింది ?

Posted: 08/14/2013 10:00 AM IST

కాంగ్రెస్ అధిష్టానం రాష్ట్రాన్ని విభజిస్తూ, తెలంగాణ ఏర్పాటు పై ప్రకటన చేయడంతో సీమాంద్ర కాంగ్రెస్ లో ఆగ్రహ జ్వాలలు వ్యక్తం అవుతున్న నేపథ్యంలో సీమాంధ్రుల సమస్యలను వినడానికి ఆంటోనీ కమిటీ ని కాంగ్రెస్ అధిష్టానం ఏర్పాటు చేసిన సంగతి తెలిసిందే. ఈ కమిటీ విభజన పై వ్యక్తం అవుతున్న భిన్నాభిప్రాయాలను పరిష్కరిస్తుంది.  సీమాంధ్ర కాంగ్రెస్ నేతల ఆందోళనలను పరిశీలించేందుకు అధిష్ఠానం నియమించిన ఆంటోనీ కమిటీ తన పని ప్రారంభించింది. కాంగ్రెస్ వార్ రూమ్‌లో మంగళవారం రాత్రి సుమారు గంటసేపు భేటీ అయింది. విధి విధానాల పై కమిటీ సభ్యులు వీరప్ప మొయిలీ, దిగ్విజయ్ సింగ్, అహ్మద్ పటేల్ తో పాటు ఏఐసీసీ సభ్యుల తో కూడా సమావేశం నిర్వహించింది. ఈ సమావేశానికి పీసీసీ అధ్యక్షుడు బొత్స సత్యనారాయణ కూడా హాజరయ్యాడు. సుదీర్ఘ చర్చలు జరిపిన అనంతరం దిగ్విజయ్ సింగ్ మీడియా తో మాట్లడారు.  వచ్చే రెండు మూడు రోజుల్లో కేంద్ర మంత్రులు , ఎంపీలతో సమావేశం కాబోతున్నట్లు చెప్పారు. ఆంటోనీ కమిటీకి అన్ని ప్రాంతాల వారు, ఎన్జీవోలు, విద్యార్థులు తమ అభిప్రాయాలు చెప్పవచ్చన్నారు. పార్లమెంట్ సమావేశాలు జరుగుతున్నందున కమిటీ హైదరాబాద్ వెళ్లడం సాధ్యం కాదన్నారు.

తెలంగాణపై ఏకాభిప్రాయానికి వచ్చేందుకు ప్రయత్నిస్తామని, త్వరలో అన్ని సందేహాలనూ నివృత్తి చేస్తామని చెప్పారు. పార్లమెంట్‌లో ముసాయిదా బిల్లు చర్చకు వచ్చినప్పుడు ఉభయ ప్రాంతాల వారూ చర్చలో పాల్గొని తమ అభిప్రాయాలను చెప్పవచ్చునని తెలిపారు. ఆంటోనీ కమిటీని కలుసుకోవాలనుకునేవారు తమ వివరాలను పీసీసీ చీఫ్ బొత్సకు ఇవ్వాలన్నారు. రాష్ట్రంలోని అన్ని పార్టీలనూ సంప్రదించాక వారి నుంచి 100 శాతం ఏకాభిప్రాయం వ్యక్తమయ్యాకే ఆంధ్రప్రదేశ్ రాష్ట్రాన్ని విభజించాలన్న నిర్ణయం తీసుకున్నామని దిగ్విజయ్ చెప్పారు. .విభజనపై కేంద్ర కేబినెట్ నిర్ణయం తీసుకుని రాష్ట్రపతికి సమాచారం పంపుతుందని, రాష్ట్రపతి ఈ అంశాన్ని ఆంధ్రప్రదేశ్ అసెంబ్లీకి పంపిస్తారని ఇదే జరుగుతుందని ఆయన అన్నారు.అంటే దీనర్ధం తెలంగాణపై శాసనసభలో తీర్మానం అవసరం లేదన్న సంకేతాన్ని ఆయన ఇచ్చారు. ఆంటోని కమిటీ కేవలం సీంమాంద్రులను చల్లబర్చడానికే అని వాదన వినిపిస్తుంది.