టాలీవుడ్ లో మరో ఫ్యామిలీ మల్టీ స్టారర్

Posted: 08/24/2013 07:39 PM IST

టాలీవుడ్ లో శ్రీకాంత్ అడ్డాల మొదలు పెట్టిన మల్టీ స్టారర్ సినిమా ‘సీతమ్మవాకిట్లో సిరిమల్లె చెట్టు ’ పుణ్యమా అని టాలీవుడ్ లో మళ్ళీ మల్టీ స్టారర్ ల హవా పెరిగిపోయింది. ఇప్పటికే ఒకే ఫ్యామిలీకి చెందిన వేరే వేరే జనరేషన్ హీరోలు అంతా కలిసి నటిస్తున్నారు. ఇందులో మొదటిది అక్కినేని వారు కలిసి నటిస్తున్న ‘మనం ’ సినిమా. ఈ సినిమాలో మూడు తరాల హీరోలు కలిసి తెర పై కనిపించబోతున్నారు. అలాగే మంచు ఫ్యామిలీకి చెందిన హీరోలు కూడా ఓ ఫ్యామిలీ ప్యాక్ మల్టీ స్టారర్ సినిమా చేయడానికి సన్నాహాలు చేస్తున్నారు. వీరందరిని చూసిన దగ్గుబాటి ఫ్యామిలీ మేం తక్కువ తిన్నామా అనుకున్నారో ఏమో గానీ దగ్గబాటి హీరోలు అయిన హీరో వెంకటేష్, రాణా, నాగచైతన్య ఈ ముగ్గురి కలయికలో ఓ భారీ చిత్రాన్ని సురేష్ ప్రొడక్షన్స్ సంస్థ నిర్మించేందుకు సన్నాహాలు చేస్తున్నట్లు టాలీవుడ్ వర్గాల సమాచారం.

ఈ సినిమా నిర్మించడానికి కూడా ఓ ప్రత్యేక సందర్భం ఉంది. 2014 సంవత్సరం నాటికి సురేష్ ప్రొడక్షన్స్ స్థాపించి యాభైఏళ్ళు అవుతుంది. ఈ సందర్భాన్ని పురస్కరించుకొని ఈ వంశం నుండి టాలీవుడ్ కు మరచిపోలేని సినిమాను అందీయాలనే ఉద్దేశ్యంతో ఈ సినిమాను చేస్తున్నట్లు చెబుతున్నారు. ఇప్పటికే దీనికి సంబంధించిన కథ, దర్శకుడు కూడా ఖరారు అయిపోయారట. సినిమా సెట్స్ మీదకు వెళ్లడమే తరువాయి. దీనికి సంబంధించిన అఫీషియల్ ప్రకటన త్వరలో వెలువరిస్తారని అంటున్నారు. మరి ఈ ఫ్యామిలీ ప్యాక్ చిత్రాలు ఏ మేరకు వర్కవుట్ అవుతాయో చూడాలి.