చంచల్ గుడా జైల్లో జగన్ నిరాహార దీక్ష

Posted: 08/24/2013 01:37 PM IST

అక్రమాస్తుల కేసులో జైల్లో ఉన్న వైయస్సార్ కాంగ్రెసు పార్టీ అధ్యక్షుడు జగన్‌మోహన్‌రెడ్డి సమైక్యరాష్ట్రం కోసం చంచల్‌గుడా జైలులో దీక్ష చేయాలనే యోచనలో ఉన్నట్లు తెలుస్తోంది. నేడో, రేపో జగన్ దీక్ష ప్రారంభించనున్నారు. జగన్ దీక్షపై పార్టీ ముఖ్య నేతలు సమావేశమయ్యారు. రాష్ట్రం సమైక్యంగా ఉంటుందని ప్రకటన వచ్చే వరకు దీక్ష చేయాలని జగన్ యోచిస్తున్నట్లు సమాచారం. ఈ మేరకు వైయస్సార్ కాంగ్రెసు పార్టీ నుంచి ఓ అధికారిక ప్రకటన వెలువడనుంది. వైసీపీ పార్టీ గౌరవాధ్యక్షురాలు వైయస్ విజయమ్మ దీక్షను గుంటూరులో పోలీసులు భగ్నం చేసిన విషయం తెలిసిందే. విజయమ్మ దీక్ష భగ్నం నేపథ్యంలో తాను దీక్ష చేయాలని వైయస్ జగన్ నిర్ణయించుకున్నట్లు తెలుస్తోంది. అన్ని ప్రాంతాలవారికి సమన్యాయం చేయాలని, అలా చేయలేకపోతే రాష్ట్రాన్ని యధాతథ స్థితిలో ఉంచాలని వైయస్ విజయమ్మ డిమాండ్ చేశారు. వైయస్సార్ కాంగ్రెసు పార్టీ అదే వైఖరితో సీమాంధ్రలో తన ఉద్యమాన్ని సాగిస్తోంది. కాంగ్రెసు అధిష్టానం రాష్ట్రాన్ని అడ్డగోలుగా విభజించడానికి పూనుకుందని వైయస్ జగన్ విమర్శిస్తున్నట్లు తెలుస్తోంది.అయితే వైఎస్ జగన్ ఆదివారం నుండి ఆమరణ నిరాహార దీక్ష చెయ్యటానికి సిద్దమైనట్లు ఆ పార్టీ వర్గాలు అంటున్నాయి

  

అబ్బాయి చెబితే ఒకే

 

వైఎస్ ఆర్ కాంగ్రెస్ పార్టీ గౌరవాధ్యక్షురాలు వైఎస్ విజయమ్మ సమరదీక్షను విరమించారు. ఆమె ఆరోగ్యం పూర్తీగా క్షీణించిన పరిస్థితులలో పార్టీ అధ్యక్షుడు, కుమారుడు వైఎస్ జగన్మోహన రెడ్డి నచ్చజెప్పడంతో విజయమ్మ దీక్ష విరమించారు. రాష్ట్రాన్ని విభజిస్తే అన్ని ప్రాంతాలకు సమన్యాయం చేయాలని, అలా చేయలేని పక్షంలో రాష్ట్రాన్ని యథాతథంగా ఉంచాలన్న డిమాండ్‌తో విజయమ్మ గుంటూరులో ఆమరణదీక్ష చేపట్టిన విషయం తెలిసిందే. తక్షణం దీక్ష విరమించాలన్న వారి విజ్ఞప్తిని ఆమె తిరస్కరించారు. దాంతో వారు బలవంతంగా పోలీస్ వాహనంలో ప్రభుత్వ ఆస్పత్రికి తరలించారు. ఆస్పత్రిలో కూడా ఆమె దీక్ష కొనసాగించారు. ఇదే విధంగా దీక్ష కొనసాగిస్తే ప్రమాదకరం అని వారు హెచ్చరించారు. ఆమె మూత్రపిండాలు పాడయ్యే అవకాశముందన్నారు. తక్షణం వైద్యచికిత్స అందించకుంటే మెదడు మీదా ప్రభావం చూపుతుందని చెప్పారు. కీటోన్ బాడీస్ విడుదలవుతున్నట్లు తేలిందని, ఇది ప్రమాదకరమని వైద్యులు తెలిపారు. కోమాలోకి వెళ్లే ప్రమాదం కూడా ఉందని వైద్యులు హెచ్చరించారు. అయినా ఆమె వినలేదు. దీక్ష కొనసాగిస్తానని చెప్పారు. ఈ పరిస్థితులలో జైలు అధికారుల సహకారంతో జగన్ ఫోన్ లో మాట్లాడారు. ఆరోగ్యకారణాల రీత్యా దీక్ష విరమించమని తల్లికి ఆయన నచ్చజెప్పారు. తొలుత ఆమె జగన్ చెప్పినా వినలేదు. ఉద్యమాన్ని కొనసాగిద్దామని, దీక్ష విరమించమని ఆయన కొద్దిసేపు నచ్చజెప్పిన తరువాత విరమించడానికి ఆమె అంగీకరించారు. అయితే వైసీపీ నాయకుల్లో కొత్త ఉత్సహాం కనబడుతుంది. పార్టీ అధినేత జైల్లో సమర దీక్ష చెయ్యటానికి సిద్దమవుతున్నాడని తెలియటంతో.. వైసీపి సీనియర్ నాయకులు వైఎస్ జగన్ ను కలిసే పనిలో బిజీగా ఉన్నారు.