సీతమ్మ అరెస్ట్ వారెంట్ జారీ చేసిన కోర్టు

Posted: 09/12/2013 07:00 PM IST

Heroine anjali issued arrest warrant at chennai court

హీరోయిన్ అంజలికి చెన్నైలోని సైదాపేట కోర్టు నాన్ బెయిలబుల్ అరెస్ట్ వారెంట్ జారీ చేసింది. దర్శకుడు కళంజియం వేసిన పరువు నష్టం దావా కేసులో హాజరు కావాలని పలు సార్లు ఆమెకు నోటీసులు జారీ చేసినా హాజరు కాక పోవడంతో ఆగ్రహానికి గురైన కోర్టు ఆమెపై నాన్ బెయిలబుల్ అరెస్ట్ వారెంట్ జారీ చేసింది. ఎన్ని అవకాశాలు ఇచ్చినా అంజలి కోర్టు ఆదేశాలను బేఖాతరు చేయడంతో ఈ అరెస్ట్ వారెంట్ జారీ అయింది. అంజలికి అరెస్టు వారెంట్ జారీ చేయాలని పిటీషనర్ కళంజియం కూడా కోర్టును కోరారు. పిన్ని భారతీదేవి, దర్శకుడు కళంజియం తనను ఏటీఎంలా వాడుకుంటున్నారని, తన ఆస్తులు వాడుకుంటున్నారని, మానసికంగా హింసిస్తున్నారని మీడియాతో సంచలన వ్యాఖ్యాలు చేసిన అంజలి ఆ తర్వాత అజ్ఞాతంలో వెళ్లి అందరినీ హైరానా పెట్టిన సంగతి తెలిసిందే. అంజలి ఆ తర్వాత అజ్ఞాతం వీడిన ఆమె తెలుగు సినిమాల్లో నటిస్తూ బిజీగా గడుపుతోంది. కాగా....అంజలి తనపై ఆరోపణలు చేయడంపై అభ్యంతరం వ్యక్తం చేస్తూ దర్శకుడు కళంజియం ఆమెపై పరువునష్టం దావా వేసారు. అంజలి తన సినిమాకు డేట్స్ ఇచ్చి హాజరు కావడం లేదని, ఆమె మూలంగా తమకు లక్షల్లో నష్టం వాటిల్లిందని ఆయన అంటున్నారు. ఏప్రిల్ 19వ తేదీన సైదాపేట కోర్టులో పరువునష్టం దావాను దాఖలు చేశారు. తదనంతరం ఆ కేసు 10సార్లు విచారణకు వచ్చింది. చివరి 4 సార్లు తప్పనిసరిగా హాజరుకావాలని కోర్టు ఆదేశించినప్పటికీ అంజలి హాజరు కాలేదు. ఈ రోజు కేసు విచారించిన కోర్టు అక్టోబరు 3కు వాయిదా వేసింది. ఆ రోజు తప్పనిసరిగా హాజరుకావాలని అరెస్టు వారెంట్ వార్నింగ్ ఆదేశాలు జారీ చేసింది.