గోల్కొండ వజ్రం.. ప్రపంచ ప్రసిద్ధి చెందిన వజ్రాలలో ఒకటి!

Posted: 01/06/2015 06:22 PM IST

ప్రపంచవ్యాప్తంగా ప్రసిద్ది చెందిన వజ్రాలు ఎన్నో వున్నాయి. వాటి విలువ ఆకాశమే హద్దు అన్నట్లుగా వుంటాయి. ఇతర వ్యవహారాలెందుకు.. కోహినూర్ వజ్రాన్నే ఉదాహరణగా తీసుకోండి.. లండన్’లో సురక్షితంగా వున్న ఈ వజ్రం విలువను ఎవరూ లెక్కగట్టలేరు. భారతదేశానికి చెందిన ఈ వజ్రాన్ని తెల్లదొరలు కొల్లగొట్టుకుపోయిన సంగతి తెలిసిందే! ఆనాడే దాని విలువను పసిగట్టిన వాళ్లు.. ఎంతో తెలివిగా దానిని ఎత్తుకెళ్లిపోయారు.

ఆ వ్యవహారం కాస్త పక్కన పెడితే.. ఈ కోహినూర్ వజ్రంతోబాటు భారత్’లో లభించిన మరికొన్ని వజ్రాలు కూడా ఎంతో ప్రసిద్ధి చెందినవి వున్నాయి. అందులో గోల్కొండ వజ్రం ఒకటి. గొల్కొండ గనుల్లో లభ్యమైన ఈ వజ్రానికి 400 సంవత్సరాల చరిత్ర వుంది. ఒకప్పుడు హైదరాబాద్ చివరి నిజాం దగ్గర వుండేది. 1993లో దీనిని వేలం వేసినప్పుడు దాదాపు 57 కోట్లరూపాయలు పలికింది. కానీ అదే 2013 ఏప్రిల్ 13న న్యూయార్క్’లో క్రిస్టీస్ సంస్థ నిర్వహించిన వేలంలో ఈ 76 క్యారెట్ల వర్ణరహిత వజ్రం.. ఏకంగా 211 కోట్ల రూపాయల ధర పలికింది. దీన్ని బట్టే అర్థం చేసుకోవచ్చు.. దీనికెంత ప్రాధాన్యత వుందో!

క్లారిటీ, కట్, క్యారెట్ అనే మూడు అంశాల్లోనూ ఎంతో విశిష్టత వున్న ఈ వజ్రానికి ఆర్చ్‌డ్యూక్‌ జోసెఫ్‌ డైమండ్‌ అని పేరు పెట్టారు. ఇంకొక విషయం ఏమిటంటే.. గోల్కొండ గనుల్లో ఈ వజ్రంతోబాటు ప్రసిద్ధి చెందిన డ్రెస్‌డెన్‌ గ్రీన్‌ డైమండ్‌, హోప్‌ డైమండ్‌, కోహినూర్‌ వజ్రం కూడా లభ్యమయ్యాయి.