జిడ్డు చర్మానికి చెక్ పెట్టే ‘ఖర్బూజ’

Posted: 05/25/2015 07:13 PM IST

వేసవికాలం వచ్చిందంటే చాలు.. ఎండతాపం ప్రభావానికి చెమట ఎక్కువగా విసర్జించడంతో చర్మం జిడ్డుగా మారుతుంది. ముఖ్యంగా అందంగా వుండే ముఖం చెమటతో జిడ్డుగా మారిపోయి.. అందవిహీనంగా తయారవుతుంది. ఇటువంటి పరిస్థితుల్లో బయటికెళ్తే.. దుమ్ము, ధూళి, కాలుష్య వాతావరణంతో చర్మసమస్యలు మరీ ఎక్కువవుతాయి. ఫలితంగా నల్లని మచ్చలు ఏర్పడటం, మొటిమలు రావడం, కంటికింద నల్లటి వలయాలు ఏర్పడటం వంటివి సమస్యలు అధికమవుతాయి. అలాకాకుండా జిడ్డు చర్మం నుంచి త్వరగా ఉపశమనం పొందితే.. ఆ సమస్యలను అధిగమించవచ్చు.

జిడ్డు చర్మం సమస్య నుంచి ఉపశమనం పొందేందుకు మార్కెట్ లో రకరకాల బ్యూటీ ప్రోడక్ట్స్ లభ్యమవుతాయి. అయితే.. వాటికంటే ఇంట్లోనే కొన్ని పండ్లతో తయారుచేసుకునే ఫేస్ ప్యాక్స్ మరింత సమర్థవంతంగా పనిచేసి.. ఆ సమస్య నుంచి తక్షణమే రక్షణ కల్పిస్తాయని బ్యూటీషియన్లు అంటున్నారు. అలా ఇంట్లో చేసుకునే ఫేస్ ప్యాక్ లలో ఖర్బూతో తయారైన ప్యాక్ ఈ జిడ్డు చర్మం నుంచి త్వరగా ఉపశమనం కల్పించడంతోపాటు చర్మసౌందర్యాన్ని మరింత మెరుగుపరుస్తుందని వారు చెబుతున్నారు. చర్మంను రక్షించే పోషకాలు ఇందులో పుష్కలంగా వుంటాయి కాబట్టి.. దీంతో తయారయ్యే ఫేస్ ప్యాక్ చాలా మంచిదని సూచిస్తున్నారు. మరి.. ఖర్బూజతో ఫేస్ ప్యాక్ ఎలా చేస్తారో తెలుసుకుందామా..

ఖర్బూజ ఫేస్ ప్యాక్ :

ఖర్బూజ పండును ముందుగా ముక్కలుగా కోసుకోవాలి. అనంతరం ఆ ముక్కల్ని బ్లెండర్‌లో వేసి మెత్తటి గుజ్జులా పట్టాలి. అలా గుజ్జు చేసిన తర్వాత అందులో అర స్పూన్‌ నిమ్మరసం, కొద్దిగా శెనగపిండి వేసి బాగా కలుపుకోవాలి. ఈ మిశ్రమాన్ని ఫేస్‌ప్యాక్‌లా తయారయ్యే వరకు కలుపుతుండాలి. అనంతరం ఈ పేస్టును ముఖం, మెడ మీద రాసుకోవాలి. పావుగంట తరువాత గోరు వెచ్చటి నీళ్లతో ముఖాన్ని శుభ్రంగా కడిగేయాలి. అంతే! ఇలా వారానికి మూడుసార్లు చేస్తే.. జిడ్డు చర్మం నుంచి త్వరగా ఉపశమనం పొందవచ్చు. ఖర్భూజను ముక్కలుగా కట్ చేస్తున్నప్పుడు జ్యూస్ వెలువడుతుంది. ఆ జ్యూస్‌ను టోనర్‌గా ఉపయోగించుకోవచ్చు.

పొడిచర్మానికి ఖర్బూజ ఫేస్ ప్యాక్ :

ఖర్బూజను ముక్కలుగా కోసుకున్న అనంతరం వాటిని మిక్సీలో వేసి గుజ్జులా తయారుచేసుకోవాలి. అనంతరం ఆ గుజ్జులో కొద్దిగా పాల మీగడ, ముల్తానీ మట్టి కలపాలి. ఈ మిశ్రమాన్ని ఫేస్‌ ప్యాక్‌లా వేసుకుంటే చర్మానికి అవసరమైన తేమ అందుతుంది. ఎండాకాలంలో చర్మం నిర్జీవం అయిపోకుండా మెరుస్తుంటుంది.