ఆ సన్నివేశాల్లో కార్తీక ఇరగదీసేసిందట!

Posted: 09/29/2014 03:39 PM IST

‘‘జోష్’’ సినిమాతో తెలుగుతెరకు పరిచయమైన కార్తీక.. ఆ సినిమాతో టాలీవుడ్ లో తన సత్తా చాటుకుంటుందామని అనుకుంది. కానీ.. ఆ మూవీ బాక్సాఫీస్ దగ్గర బోల్తాపడిపోవడంతో ఎవ్వరూ ఈమెకు ఆఫర్లు ఇవ్వడానికి ముందుకు రాలేదు. అటు తమిళంలో కూడా ఒక్క ‘‘రంగం’’ సినిమా తప్ప మిగతా సినిమాలన్నీ ఫ్లాప్ కావడంతో అక్కడ కూడా నిరాశే మిగిలింది. దీంతో ఈ అమ్మడికి ఎక్కడ అవకాశాలు రావోనన్న భయంతో.. తాను స్టార్ డమ్ కోసం ఏ సినిమాల్లోనైనా నటించడానికి సిద్ధమేనని అప్పట్లో ప్రకటించేసింది. (అంటే అందాల ఆరబోతకు తాను సిద్ధమేనని పరోక్షంగా చెప్పేసిందన్నమాట!). అయినా కూడా ఈమెకు అరకొర అవకాశాలు మాత్రమే వచ్చాయి. అయితే ఇంతలోనే ఈ అమ్మడికి టాలీవుడ్ నుంచి బంపర్ ఆఫర్ కాకపోయినా.. అల్లరి నరేష్ సరసన ‘‘బ్రదర్ ఆఫ్ బొమ్మాళీ’’ చిత్రంలో సిస్టర్ పాత్రలో నటించే అవకాశం లభించింది. వచ్చిన ఆఫర్ ను వద్దనుకోలేక అందుకు ఈమె గ్రీన్ సిగ్నల్ ఇచ్చేసింది. ప్రస్తుతం ఆ సినిమా చివరి దశకు చేరుకుంది.

ఈ నేపథ్యంలో అల్లరి నరేష్ తన మూవీ గురించి మాట్లాడుతూ కొన్ని ఆసక్తికరమైన విషయాలను వెల్లడించాడు. ముఖ్యంగా కార్తీక గురించి చెబుతూ ఆమెను ప్రశంసలతో ఆకాశానికెత్తేశారు. కార్తీక ఈ చిత్రంలో రౌడీ పాత్రలో బాగానే ఇరగదీసిందని నరేష్ పేర్కొన్నాడు. ముఖ్యంగా ఫైట్ సీన్స్ చేయడం తొలిసారి అయినా కూడా సునాయాసంగానే చేసింది ఆమెను మెచ్చుకున్నాడు. తమిళంలో బిజీగా వున్నప్పటికీ.. తనకు ఈ సినిమాలో పాత్ర నచ్చడంతో డేట్లు ఎడ్జెస్ట్ చేసుకుని మరీ నటించిందని తెలిపాడు. ఈ సినిమాలో కార్తీక పాత్ర స్పెషల్ అట్రాక్షన్ గా వుంటుందని, ప్రేక్షకులకు నిజంగానే ఆమె చేసిన ఫైటన్ సీన్స్ బాగానే ఆకట్టుకుంటాయని పేర్కొన్నాడు.

అల్లరి నరేష్, మోనాల్ గుజ్జర్ జంటగా నటించిన ఈ చిత్రానికి చిన్నికృష్ణ దర్శకత్వం వహించారు. ఈ సినిమాలో నరేష్ కు ట్విన్ సిస్టర్ గా కార్తీక నటించింది. ఇప్పటికే దాదాపు 80 శాతం షూటింగ్ పూర్తి చేసుకుందని, అక్టోబర్ 4వ తేదీన ఆడియో రిలీజ్ కానుందని యూనిట్ వర్గాలు పేర్కొంటున్నాయి. అటు కార్తీక.. ఈ సినిమాతోనైనా సత్తా చాటుకుని టాలీవుడ్ లో తన స్థానం పదిలం చేసుకోవాలని భావిస్తోందట! ఆ నేపథ్యంలోనే అమ్మడు ఈ సినిమాలో చాలా కష్టపడిందని యూనిట్ సభ్యులు చెబుతున్నారు. మరి ఈ మూవీతోనైనా కార్తీక టాలీవుడ్ లో సక్సెస్ సాధిస్తుందో లేదో చూడాలి!

AS