చినబాబు ఎంట్రీ అదిరిపోతోంది...!

Posted: 06/10/2016 12:52 PM IST

నటసింహం నందమూరి బాలకృష్ణ ప్రెస్టేజియస్ గా చేస్తున్న వందో చిత్రం 'గౌతమిపుత్ర శాతకర్ణి'. ఈ సినిమాని క్రియేటివ్ డైరెక్టర్ క్రిష్ తనదైన స్టైల్లో తెరకెక్కిస్తున్న సంగతి తెలిసిందే. మొరాకోలో కీలక సన్నివేశాలను చిత్రీకరించి వచ్చిన ఈ టీమ్ ఇప్పుడు మరో షెడ్యూల్ చేసేందుకు సన్నాహాలు చేస్తోంది. ప్రస్తుతం బాలకృష్ణ యుఎస్ లో పుట్టినరోజు వేడుకలు జరుపుకుంటున్నారు.

ఈ యుఎస్ ట్రిప్ అనంతరం రెగ్యులర్ గా షూటింగ్ లో పాల్గొనే అవకాశాలు కనిపిస్తున్నాయి. ఈ షెడ్యూల్ లో బాలకష్ణ తనయుడు మోక్షజ్ఞ పై సన్నివేశాలు చిత్రీకరించేందుకు డైరెక్టర్ క్రిష్ సిద్ధమైనట్లుగా క్రిష్ సన్నిహిత వర్గాలనుంచి సమాచారం తెలుస్తోంది. దీనికోసం మోక్షజ్ఞ యాక్టింగ్ రిహార్సల్స్ ని స్టార్ట్ చేశాడట. దర్శకుడు క్రిష్ పర్యవేక్షణలో అభినయం, డైలాగ్ డెలివిరీపై దృష్టిపెట్టినట్లుగా తెలుస్తోంది.

ఇక ఈ సినిమాలో చినబాబు మోక్షజ్ఞ ఎంట్రీ అదిరిపోతుందని, రాజకుమారుడి గెటప్ లో అందరి చూపులను ఆకట్టుకుంటాడని చెప్తున్నారు సినీ విశ్లేషకులు.

- మూర్తి