Posted: 02/26/2013 01:15 PM IST

ముఖ్యమంత్రి మమతా బెనర్జీ పదవీ ప్రమాణ స్వీకారం, ఆమె గతంలో నేతృత్వం వహించిన సింగూర్‌ ఉద్యమాలను వ్యంగ్యంగా చిత్రీకరించిన ఓ చలనచిత్రానికి క్లియరెన్స్‌ ఇచ్చేందుకు సెన్సార్‌ బోర్డు తిరస్కరించింది. ప్రముఖ సాహితీవేత్త మహాపాత్రా దేవి కుమారుడు నబరున్‌ భట్టాచార్య రచన ఆధారంగా సుమన్‌ ముఖోపాధ్యాయ దర్శకత్వంలో తృణమూల్‌ కాంగ్రెస్‌ రెబల్‌ ఎంపి కథానాయకుడిగా నిర్మితమైన ఈ చిత్రం 'కంగల్‌ మల్సాత్‌' (పేదవాడి ఆర్తనాదం) ప్రజల్లో తిరుగుబాటును రెచ్చకొట్టేదిగా వుందని, అందువల్లే సెన్సార్‌ సర్టిఫికెట్‌ను నిరాకరిస్తున్నామని కేంద్ర ఫిల్మ్‌ సర్టిఫికేషన్‌ బోర్డు చిత్ర నిర్మాతలకు పంపిన లేఖలో వివరించింది. రాష్ట్రం నుండి టాటా గ్రూప్‌ నిష్క్రమణకు కారణమైన సింగూర్‌ ఉద్యమం వంటి సామాజిక ఉద్యమ ప్రతిష్టను దిగజార్చే విధంగా ఈ చిత్రంలో చిత్రీకరించారని, అనవసరమైన, అసభ్య భాషను ఉపయోగించి సమాజంలో అనేక మంది ప్రతిష్టను దిగజార్చే ప్రయత్నం చేశారని సెన్సార్‌ బోర్డు అభ్యంతరం వ్యక్తం చేసింది. తమ చిత్రానికి రాజకీయ వివక్షతోనే ప్రభుత్వం సెన్సారింగ్‌ ఇబ్బందులు పెడుతున్నదని ఆరోపించిన చిత్ర దర్శకుడు సుమన్‌ ముఖోపాధ్యాయ సెన్సార్‌ బోర్డు నిర్ణయాన్ని సవాలు చేస్తూ ఫిల్మ్‌ సర్టిఫికేషన్‌ అప్పిలేట్‌ ట్రిబ్యునల్‌కు అప్పీలు చేయనున్నట్లు తెలిపారు. రాష్ట్ర ప్రభుత్వం నియమించిన సభ్యులతో కూడిన సెన్సార్‌ బోర్డు రివైజింగ్‌ కమిటీ సిఫార్సుల ఆధారంగా చిత్రం విడుదలకు సెన్సార్‌ బోర్డు నిరాకరించింది. సింగూరు నిరసనలపై తీసిన చిత్రాన్ని నిషేధించినందుకు వామపక్షాలు కూడా మమతా ప్రభుత్వంపై తీవ్ర విమర్శలు చేశాయి. రాష్ట్రంలో సాంస్కృతిక రంగంలో ప్రజాస్వామ్యానికి చోటు లేకుండా పోతోందని వామపక్ష నాయకులు విమర్శించారు.

రాజకీయాల్లో ఎలాగూ ప్రజాస్వామ్యం గొంతు నులుముతున్నారు, దీని ప్రభావం సాంస్కృతిక రంగంపై కూడా పడుతుందని సిపిఎం నేత మహ్మద్‌ సలీమ్‌ అన్నారు. ముఖ్యమంత్రి మనోభావాలకు వ్యతిరేకంగా వున్నట్లైతే అది కార్టూన్‌ కానివ్వండి, లేదా ఇ మెయిల్‌, ఎస్‌ఎంఎస్‌, ప్రసంగాలు, రాజకీయ నిరసనలు లేదా ఇతర ఏ రూపాలైనా సరే వాటికి అడ్డంకులు తప్పవని అన్నారు. తృణమూల్‌ కాంగ్రెస్‌ ఎంపి కబీర్‌ సుమన్‌ మమతా బెనర్జీ ప్రభుత్వాన్ని తీవ్రంగా విమర్శించారు. సింగూరు సమస్య, మమతా బెనర్జీ ప్రమాణస్వీకారం వంటి ప్రస్తావనలున్నాయంటూ కంగల్‌ మల్సాత్‌ సినిమాకు సెన్సార్‌ బోర్డు ఆమోద ముద్ర ఇవ్వకపోవడాన్ని ఆయన నిరసించారు.  సింగూరు గురించి అసలు అందులో ప్రస్తావన లేదన్నారు. చలన చిత్ర నిర్మాత సుమన్‌ ముఖోపాధ్యాయ కూడా ఈ నిర్ణయాన్ని తీవ్రంగా విమర్శించారు. దీనిపై ఫిల్మ్‌ సర్టిఫికేషన్‌ అప్పిలేట్‌ ట్రిబ్యునల్‌కు వెళ్ళారు. ఒక నిర్మాతగా, పౌరుడిగా ఒక రాజకీయ సంఘటనకు సంబంధించి తన అభిప్రాయాన్ని వెల్లడించే హక్కు తనకు వుందని అన్నారు.