రాజధాని లేదంటే- చిరంజీవి రాజీనామా?

Posted: 08/03/2013 09:02 PM IST

 

సీమాంద్రలో ఉద్యమం ఉవ్వెత్తున్న ఎగిసిపడుతున్న నేపథ్యంలో కేంద్ర మంత్రి చిరంజీవి ఎట్టకేలకు నోరు విప్పారు. హైదరాబాదును రెండు రాష్ట్రాలకు శాశ్వత ఉమ్మడి రాజధానిగా చేయాలని, అందుకు అనుగుణంగా నిర్ణయం తీసుకోకపోతే రాజీనామా చేస్తానని కేంద్ర మంత్రి చిరంజీవి అన్నారు. చండీఘడ్ మాదిరిగా హైదరాబాదును చేయాలని ఆయన డిమాండ్ చేశారు. హైదరాబాదును కేంద్ర పాలిత ప్రాంతంగా చేయాలని, లేదంటే దేశానికి రెండో రాజధానిగా చేయాలని ఆయన అన్నారు. హైదరాబాదును రెండో రాజధానిగా చేయాలని డాక్టర్ అంబేడ్కర్ సూచించారని, అందుకు అనుగుణంగానే తాను డిమాండ్ చేస్తున్నానని ఆయన అన్నారు. దేశానికి హైదరాబాదును రెండో రాజధానిగా చేస్తూ, రెండు రాష్ట్రాలకు ఉమ్మడి రాజధానికి శాశ్వతంగా ఉంచవచ్చునని ఆయన అన్నారు. హైదరాబాదు విషయంలో అందరికీ ఆమోదయోగ్యమైన నిర్ణయం ఉండాలని తాను కాంగ్రెసు పార్టీ అధిష్టానం పెద్దలకు చెప్పినట్లు ఆయన తెలిపారు. తాను సమైక్యవాదినని, అయితే రాష్ట్రం రావణకాష్టంగా మారుతుంటే అధిష్టానం విభజనకు నిర్ణయం తీసుకుందని, అది అనివార్యంగా మారిందని, దాంతో అధిష్టానం నిర్ణయానికి కట్టుబడి ఉంటున్నానని ఆయన వివరించారు.

 

అయితే, రాష్ట్ర విభజన విషయంలో ఎక్కడ అన్యాయం జరుగుతుందో గుర్తించి, అలా జరగకుండా చూస్తానని, అందుకే హైదరాబాదును ఉమ్మడి రాజధానిగా చేయాలని కోరుతున్నానని ఆయన చెప్పారు. తమ అభ్యంతరాలను వినేందుకు ఏర్పాటు చేసే ఉన్నత స్థాయి కమిటీకి రక్షణ మంత్రి ఎకె ఆంటోనీ సారధ్యం వహిస్తారని అనుకుంటున్నట్లు ఆయన తెలిపారు. అత్యధిక పార్టీల అభిప్రాయం మేరకే రాష్ట్ర విభజన జరుగుతోందని ఆయన అన్నారు. కెసిఆర్‌కు తెలంగాణ కావాలా, వద్దా ఆంధ్ర ఉద్యోగులు వెళ్లిపోవాలని కె. చంద్రశేఖర రావు చేసిన వ్యాఖ్యలపై చిరంజీవి తీవ్రంగా ప్రతిస్పందించారు. సీమాంధ్ర ఉద్యోగులపై కెసిఆర్ చేసిన వ్యాఖ్యలను ఆయన ఖండించారు. రెచ్చగొట్టడం కొనసాగిస్తే పరిణామాలు మరో విధంగా ఉంటాయని ఆయన హెచ్చరించారు.  సీమాంధ్ర ప్రజలకు అభద్రతా భావం కలిగేలా కెసిఆర్ మాట్లాడారని ఆయన అన్నారు. తెలంగాణ వస్తే కెసిఆర్ రాజకీయ నిరుద్యోగి అవుతారని ఆయన అన్నారు. సీమాంధ్ర ఉద్యోగులు వెళ్లిపోవాలని అనడానికి కెసిఆర్ ఎవరని ఆయన అడిగారు. రాష్ట్ర విభజనపై చిరంజీవి, దిగ్విజయ్ సింగ్ మాటలను సీమాంధ్ర ప్రజలు అంగీకరించబోరని కాంగ్రెసు విజయవాడ పార్లమెంటు సభ్యుడు లగడపాటి రాజగోపాల్ అన్నారు. హైదరాబాదును పంచుకుందామని చిరంజీవి చెప్పినా, హైదరాబాదు కన్నా మంచి రాజధానికి సహకరిస్తామని దిగ్విజయ్ సింగ్ చెప్పినా సీమాంధ్ర ప్రజలు వినబోరని ఆయన అన్నారు.