కిరణ్, జగన్ బంధువుల ఇళ్లను కూల్చలేవా కేసీఆర్? -తెలంగాణ లీడర్స్

Posted: 06/25/2014 06:24 PM IST

(Image source from: tdp mlas gandhi and vivek goud arrested for protesting against kcr)

కేసీఆర్ ప్రభుత్వం జారీచేసిన ఆదేశాల మేరకు తెలంగాణ రాష్ట్రంలో... ముఖ్యంగా జంటనగరాల్లో నిర్మించిన అక్రమ కట్టడాలను కూల్చేస్తున్న విషయం తెలిసిందే! ఈ వ్యవహారం మీద వ్యతిరేకంగా గళం ఎత్తినవారు... నోటీసులు జారీ చేయకుండా ఎలా కూల్చేస్తారని ప్రశ్నించారు. దానికి సమాధానంగా కేసీఆర్ కూడా ఘాటుగానే జవాబిచ్చారు. ఏ అనుమతులు లేకుండా నిర్మించిన భవనాలను నోటీసులు జారీ చేయాల్సిన అవసరం లేదని, నేరుగానే వాటిని కూల్చేయాలని చెప్పారు. ఈ నేపథ్యంలోనే మాధాపూర్ గురుకల్ ట్రస్ట్ లో, అయ్యప్ప సొసైటీలో కూల్చివేతలు కొనసాగుతున్నాయి. ఈ విధంగా కూల్చివేయడం అన్యాయమని, అసలు వాళ్లు చేసిన తప్పేంటని ప్రశ్నిస్తూ ఇద్దరు టీడీపీ ఎమ్మెల్యేలు నిరసనకు దిగారు.

వీరిలో కుత్బుల్లాపూర్ ఎమ్మెల్యే అయిన వివేక గౌడ్... రాజకీయ ఇళ్లను రెగ్యులరైజ్ చేసిన ప్రభుత్వం, సామాన్యుల ఇళ్లను ఎలా కూల్చుతున్నారని వారి మీద విమర్శల దాడి చేశారు. అలాగే.. అక్రమంగా ఇళ్లను నిర్మించుకున్న మంత్రి మహేందర్ రెడ్డి, మాజీ ముఖ్యమంత్రి కిరణ్ కుమార్ రెడ్డి సోదరుడు, దివంగత ముఖ్యమంత్రి రాజశేఖర్ రెడ్డి సోదరుడు అయిన వివేకానందరెడ్డి వంటి తదితర నాయకుల ఇళ్లను ఎందుకు కూల్చడం లేదని ప్రశ్నించారు. ఇదంతా కావాలనే కొందరు చేయిస్తున్నారని, ఇలా చేయడం చాలా దారుణమని పేర్కొన్నారు. ఈ వ్యవహారమంతా చూస్తుంటే... కేసీఆర్ కూడా బడాబాబులకు అమ్ముడుపోయారని ఆయన ఆరోపించారు. అలాగే కేసీఆర్ కూతురు, ఎంపీ అయిన కవిత మీద కూడా విరుచుకుపడ్డారు. ‘‘గతంలో ఎంపీ కవిత నిజామాబాద్ బాధితులకు అండగా వుంటానని మాటిచ్చారు. కానీ ఇప్పుడు అన్యాయంగా జరుగుతున్న ఈ ఘోరాన్ని ఆపడానికి ఆమె ముందుకు రావడం లేదు. ఈ కూల్చివేతలను చూస్తూ.. కూర్చిండిపోయారు’’ అని తీవ్రంగా ఆరోపించారు.

మరోవైపు శేరిలింగంపల్లి టీడీపీ ఎమ్యెల్యే అయిన గాంధీ కూడా ఈ వ్యవహారం గురించి మాట్లాడుతూ... ‘‘కేసీఆర్ ప్రభుత్వం బడాబాబులతో చేతులు కలిపి ఈ వ్యవహారాన్ని నడిపిస్తున్నారు. అసలు అక్రమ కట్టడాలను కూల్చేయాలని అనుకుంటే.. ముందుగా బడాబాబుల ఇళ్లను ఎందుకు కూల్చడం లేదు. వారు నిర్మించిన హోటళ్లు, రెస్టారెంట్లను ఎందుకు మూయించడం లేదు. నిజమైన అక్రమదారులను పక్కకు పెట్టి, కొనుగోలుదార్ల ఇళ్లను అనవసరంగా కూల్చుతున్నారు’’ అని చెప్పారు. ముఖ్యమంత్రి పదవిలో వున్న కేసీఆర్ రెండు నాలుకల మనిషిగా వ్యవహరిస్తున్నారని విరుచుకుపడ్డారు. ఈ విధంగా ఇద్దరు ఎమ్మెల్యేలు కట్టడాల కూల్చివేతలకు తమ నిరసనను వ్యక్తం చేయగా... పోలీసులు వారిని అరెస్ట్ చేశారు.