వారిద్దరూ శాంతి ప్రతీకలు..., దేశ ముద్దుబిడ్డలు

Posted: 12/19/2014 08:32 AM IST

Malala satyarthi peace symbols america senate

నోబెల్ అవార్డు గ్రహీతలు కైలాష్ సత్యార్థి, మలాలాకు మరో అరుదైన గౌరవం దక్కింది. అమెరికా సెనెట్ వీరిద్దర్నీ శాంతి ప్రతీకలంటూ ప్రశంసించింది. ఈ మేరకు సెనేట్ రెజల్యూషన్ పాస్ చేసింది. భారత్ కు చెందిన కైలాష్ సత్యార్థి, పాక్ వనిత మలాలా విద్య కోసం ఎంతో కృషి చేయటంతో పాటు దేశంలో శాంతి స్థాపన కోసం తమవంతు ప్రయత్నాలు చేస్తున్నారని అమెరికా సెనేట్ ప్రశంసించింది. వీరిద్దర్నీ శాంతి ప్రతీకలుగా గుర్తిస్తూ టామ్ హార్కిన్ తీర్మానం ప్రవేశపెట్టగా ఆమోదం లభించింది.

సత్యార్థి వల్ల దాదాపు 80వేలకు పైగా విద్యార్థులు బాలకార్మిక దుస్థితి నుంచి బయట పడ్డారని ప్రశంసించింది. అదేవిధంగా పాక్ లో ప్రాణాలకు సైతం తెగించి మలాలా బాలికల విద్య కోసం కృషి చేస్తోందని కీర్తించింది. వీరిద్దరికీ ఈ బిరుదులు ఇవ్వటం పట్ల గర్విస్తున్నట్లు సెనేటర్లు తెలిపారు. అటు అమెరికా సెనేట్ నిర్ణయంపై ప్రపంచ వ్యాప్తంగా హర్షం వ్యక్తం అవుతోంది. అవార్డు గ్రహీతలిద్దరికి సముచిత పేరు దక్కిందని అంటున్నారు.

కార్తిక్