మోదీ స్థానంలో బంగారు చీపురు పట్టిన తొలి మహిళ

Posted: 06/29/2014 02:03 PM IST

Ratha yatra flagged off by anandiben patel

గుజరాత్ కి మొదటిసారిగా ఎన్నికైన మహిళా ముఖ్యమంత్రి ఆనందిబేన్ పటేల్ ఈరోజు రాష్ట్రంలో 137 వ జగన్నాథ రథ యాత్రను పాహింద్ విధి అనే తంతుతో ప్రారంభించారు. మహిళ ఈ విధిని నిర్వహించటం గుజరాత్ లో ఇదే మొదటిసారి. జమైపూర్ జగన్నాధ ఆలయంలో రథయాత్రకు ముందుగా రథం వెళ్ళే బాటను శుభ్రం చేసిన సంకేతంగా బంగారు చీపురు పట్టుకున్న ముఖ్యమంత్రి ఆనందిబెన్ పటేల్.

ఈ సందర్భంగా ప్రధాన మంత్రి నరేంద్ర మోదీ శుభాకాంక్షలు తెలియజేసారు. ఉదయం 6.45 కి ముఖ్యమంత్రి రాకతో మొదలైన జగన్నాధ రథయాత్ర దేశంలో సమృద్ధిగా వర్షాలు పడేట్టుగాను, కరువుకాటలను రాకుండానూ అనుగ్రహిస్తుందన్న ఆకాంక్షను మోదీ వెలిబుచ్చారు.

ఆషాడ దూజ్ (ఆషాడ మాసంలో రెండవ రోజు) పాహింద్ విధిని సంపూర్ణం చేసి రథయాత్రను సాగించటం జరిగిందంటూ గుజరాత్ ముఖ్యమంత్రి ట్విట్టర్లో తెలియజేసారు.

పాహింద్ విధిని గుజరాత్ లో ఇంతవరకు ఎక్కువ సార్లు చేసిన నరేంద్ర మోదీ తన జ్ఞాపకాలను తాజాగా గుర్తు చేసుకుంటూ ఆ అనుభవం మరవలేనిదని అన్నారు. ఈ రోజు రథారూఢుడైన జగన్నాధుడు అందరినీ ఆశీర్వదిస్తాడని, ఈ సందర్భంగా అందరికీ శుభాకాంక్షలని మోదీ మైక్రో బ్లాగ్ ట్విట్టర్ లో సందేశమిచ్చారు.

-శ్రీజ