నల్ల కోతి పై లీగల్ యుద్దం?

Posted: 08/08/2014 11:07 AM IST

యుద్దం అనేది దేశాల మద్య, ఇద్దరి వ్యక్తుల మద్య జరుగుతుంది. కానీ ఇక్కడ నల్ల కోతిపై యుద్దం చేయటానికి సిద్దమైంది వీకీపీడియా. మూడేండ్ల కిందట సొంతంగా ఫొటో (సెల్ఫీ) తీసుకొని సంచలనం సృష్టించిన ఇండోనేషియాకు చెందిన ఓ నల్లజాతి కోతి మళ్లీ హాట్ టాఫిక్‌గా మారింది. ఇప్పుడా సెల్ఫీ యాజమాన్య హక్కులపై ప్రముఖ వెబ్‌సైట్ వీకీపీడియా-ఓ ఫొటోగ్రాఫర్ మధ్య పెద్ద యుద్ధమే జరుగుతున్నది.

తమ వెబ్‌సైట్ నుంచి సెల్ఫీని తొలగించడానికి వీకీపీడియా నిరాకరిస్తున్నది. ఈ సెల్ఫీపై కోతికి పూర్తి యాజమాన్య హక్కులు ఉన్నాయని, దీనితో వైల్డ్‌లైఫ్ ఫొటోగ్రాఫర్ డేవిడ్ స్లాటర్‌కు ఎలాంటి హక్కు లేదని వీకీపీడియా వాదిస్తున్నది. ఇది ఓ జంతువు సొంతంగా చేసిన పని. దీనికి సంబంధించి మనిషికి ఎలాంటి కాపీరైట్స్ లేవు. అందుకే ఈ ఫొటోను మా పబ్లిక్ డొమైన్‌లో వాడుకుంటున్నాం అని వీకీపీడియా సైట్ ఓ సందేశాన్ని పెట్టింది.

అంతరించే ముప్పు ఎదుర్కొంటున్న ఈ నల్లరంగు జాతి కోతులను 2011లో ఫొటోగ్రాఫర్ డేవిడ్ స్లాటర్ ఫొటో తీస్తుండగా.. అవి ఆయన కెమెరాను ఎత్తుకెళ్లాయి. దానితో వందల ఫొటోలు తీశాయి. అందులో ఈ సెల్ఫీతోపాటు ఎన్నో అద్భుతమైన ఫొటోలు ఉన్నాయి. నల్లరంగు కోతి సొంతంగా తీసుకున్న ఈ ఫొటో అనతికాలంలో ప్రపంచమంతటా ప్రాచుర్యం పొందింది. ఈ క్రమంలో తన అనుమతి లేకుండా వీకీపీడియా ఈ ఫొటోను వాడుకోవడంపై లీగల్ చర్యలు తీసుకోవాలని డేవిడ్ భావిస్తున్నారు. చివరకు ఆ నల్లకోతి ఎవరికి చెందుతుందో చూడాలి.

RS