‘‘దెయ్యానికి’’ ఫైన్ వేసిన జడ్జి!

Posted: 08/09/2014 06:10 PM IST

Britain court fined 75 dollars to ghost for scaring the people

ప్రస్తుతకాలంలో దెయ్యాలు వుంటాయో లేవో తెలీదు కానీ... శ్మశానంలో ఒక దెయ్యం సంచరించినందుకు బ్రిటన్ కోర్టు దానికి జరిమానా విధించింది. ఇదిమరీ విడ్డూరంగా వుంది .(అయినా దెయ్యాలు శ్మశానంలో కాకుండా ఇంకెక్కడుంటాయి..? మీరే చెప్పండి). అయితే ఇక్కడో చిన్న తిరకాసు.. అది నిజమైన దెయ్యం కాదులెండి! మానవరూపంలో వున్న ఒక దొంగ దెయ్యం.

బ్రిటన్ లో చెందిన ఆంటోని స్టాలార్డ్ తన మిత్రునితో కలిసి పోర్ట్స్ మౌత్ లోని కింగ్ స్టన్ శ్మశానవాటికకు కొంచెం దగ్గరలో ఫుట్ బాల్ ఆడుతున్నాడు. ఇంతలోనే కొంతమంది వ్యక్తులు శ్మశానవాటికలో తమ ఆప్తులకు నివాళులు అర్పించేందుకు వచ్చారు. దీంతో వారిని గమనించిన ఆంటోనికి ఓ చిలిపి ఆలోచన వచ్చింది. తన కామెడీ కోసం వారందర్నీ భయపెడితే ఎలా వుంటుందని అనుకున్న అతడు... శ్మశానవాటికలో ఆ వ్యక్తులకు కొంతదూరంలో వెనక్కి నడుస్తూ దెయ్యంలా శబ్దాలను చేశాడు. అంతే.. అక్కడున్న వారందరూ అడ్రస్ లేకుండా పోయారు. క్షణాల్లోనే ఆ శ్మశానవాటిక మొత్తం ఖాళీ అయిపోయింది.

తీవ్ర భయభ్రాంతులకు గురైన జనం.. దారిలో పరుగులు తీస్తూ వెళుతుండగా దారిలో పోలీసులు కనిపిస్తారు. దీంతో వారు జరిగిన మొత్తం తతంతాన్ని వివరించారు. అయితే ఈకాలంలో దెయ్యాలు ఎక్కడినుంచి పుట్టుకొచ్చాయబ్బా అని భావించిన ఆ పోలీసులు.. అసలు ఆ దెయ్యం సంగతేంటో తెలుసుకుందామని శ్మశానవాటికకు చేరుకుని ఆరా తీస్తే.. అక్కడ వారికి ఆంటోని కనిపించాడు. దీంతో ఇతడే దెయ్యం వేషం వేసుకుని అందరినీ భయపెట్టించాడని తెలుసుకున్న పోలీసులు అతడ్ని అదుపులోకి తీసుకుని పలు సెక్షన్ల కింద కేసు నమోదు చేశారు.

ఇటీవలే ఈ కేసు విషయం మీద విచారించిన కోర్టు.. ఇంకెప్పుడూ ప్రజలను భయపెట్టవద్దంటూ అతని ఆదేశించింది. అతడు చేసిన ఘనకార్యానికి 75 పౌండ్ల జరిమానా విధించింది. ఇందులో 20 పౌండ్లు బాధితులకు, మరో 20 పౌండ్లు కోర్టు ఖర్చులకు చెల్లించాల్సిందిగా ఆదేశించింది. దీంతో ఈ దొంగ దెయ్యం విషయం బ్రిటన్ మొత్తం పాకిపోయింది.