పరిటాల రవి హత్యకేసులో ‘‘బాబు’’ కీలకపాత్ర?

Posted: 08/22/2014 01:13 PM IST

Ys jagan mohan reddy comments chandrababu naidu that babu know everything in paritala ravi murder case

దివంగత టీడీపీ పార్టీ ఎమ్మెల్యే పరిటాల రవి హత్య జరిగి చాలాకాలమే అయింది. ఈయన హత్య జరిగిన మరుక్షణం నుంచి పెద్ద దుమారాలే రేగాయి. ఎవరుపడితేవారు.. ఎక్కడబడితే అక్కడ ప్రత్యర్థులు నరుక్కున్నారు.. చంపుకున్నారు.. చాలా గొడవలే జరిగాయి. ఇలా కొన్నాళ్లవరకు మారణకాండ జరిగిన అనంతరం తిరిగి ప్రశాంతవాతావరణం ఏర్పడింది. అయితే తాజాగా ఇప్పుడు హత్యకేసుకు సంబంధించి రకరకాల అనుమానాలను వ్యక్తం చేస్తున్నారు. పరిటాల రవి హత్యకు ప్రధాన నిందితుడు వైఎస్ జగన్ అని టీడీపీ పార్టీ కార్యకర్తలు ఆరోపణలు చేయగా... ఈ హత్య విషయంలో బాబు కూడా కీలకపాత్ర వహించాడంటూ జగన్ వ్యాఖ్యానాలు గుప్పిస్తున్నారు.

ప్రస్తుతం ఏపీ అసెంబ్లీలో హత్యారాజకీయాలమీద చర్చలు మొదలైన నేపథ్యంలో... ఎంతోమంది మంత్రుల హత్యలకు సంబంధించి అధికార, ప్రత్యర్థ పార్టీలు వాదోపవాదనలు వినిపిస్తున్నారు. అయితే పరిటాల రవి హత్యకేసు సంబంధించి అసెంబ్లీలో చర్చలు చాలా దుమారాన్నే రేపుతున్నాయి. నిన్నటికి నిన్న.. పరిటాల రవిని హత్య చేసింది వైకాపా అధ్యక్షుడు జగన్ అంటూ టీడీపీ మంత్రి ఆరోపణలు చేయగా... అందుకు జగన్ ధీటుగానే జవాబులు ఇచ్చారు. తాజాగా ఆయన ఈ కేసుకు సంబంధించి ఓ సరికొత్త వివాదాన్ని తెరమీదకు తీసుకొచ్చారు. ‘‘పరిటాల రవి హత్య విషయంలో వున్న నిజానిజాలన్ని చంద్రబాబు నాయుడికి పూర్తి తెలుసునని.. అయినా ఏమి తెలియకుండా నటిస్తున్నాడని పేర్కొన్న ఆయన... ఆ కేసులో ప్రధాన నిందితులుగా పరిగణించబడిన జేసీ బ్రదర్స్ ను బాబు టీడీపీలో ఎందుకు చేర్చుకున్నారు’’ అంటూ తీవ్ర ఆరోపణలు చేశారు.

అసెంబ్లీ సమావేశాలు ప్రారంభమైన మొదట్లో జగన్ మాట్లాడుతూ.. ‘‘అసెంబ్లీలో ఏం జరుగుతోంది రాష్ట్రం మొత్తం చూస్తోంది. అసెంబ్లీ ప్రారంభం అవడానికి ముందు 11 మంది వైసీపీ కార్యకర్తలు చనిపోయారు. ప్రారంభమైన తర్వాత మరో ఇద్దరు.. శుక్రవారం ఉదయం మరొకరు చనిపోయారు. ఇప్పటికే మొత్తం 14 మంది వైసీపీ వర్గీయులు టీడీపీ కార్యకర్తల దాడిలో చనిపోయారు’’ అని వెల్లడించారు. ఈ నేపథ్యంలో ఆయన మాట్లాడుతూ.. ‘‘చర్చను తప్పుదోవ పట్టించేందుకే పరిటాల రవి హత్యను చర్చలోనే ప్రస్తావిస్తున్నారు. పరిటాల కేసులో కోర్టు ఇప్పటికే తీర్పునిచ్చింది. అందులో దోషులుగా తేలినవారికి శిక్ష కూడా పడింది. అంతెందుకు.. చంద్రబాబుకు పరిటాల రవి హత్య విషయంలో వున్న రహస్యాలు, నిజానిజాలన్ని తెలుసు. అందుకే జేసీ బ్రదర్స్ ను టీడీపీలోకి చేర్చుకున్నారు’’ అని పేర్కొన్నారు. ‘‘దీనిని బట్టి చూస్తుంటే.. పరిటాల రవి హత్యకేసులో బాబు కూడా ప్రధాన నిందితుడే’’నంటూ ఆయన విమర్శలు చేశారు.