అవినీతి బాటలో చంద్రబాబు మంత్రులు!

Posted: 08/26/2014 06:00 AM IST

(Image source from: Small producers council president natti kumar accused on tdp party ministers)

తెలుగుదేశం పార్టీ అధికారంలోకి వచ్చి ఇంకా సరిగ్గా మూడునెలలైనా అవలేదు.. అప్పుడే ఆ పార్టీ మంత్రులు అవినీతిబాటలో పయనిస్తున్నట్టు వార్తలు షికార్లు చేస్తున్నాయి. ఒకవైపు ఆంధ్రరాష్ట్ర ముఖ్యమంత్రి చంద్రబాబు నాయుడు తన రాష్ట్రాన్ని కొత్తగా నిర్మించాలి.. అవినీతిని పూర్తిగా అంతమొందించాలని పిలుపునిస్తుంటే.. ఆయన మంత్రులు, సహచరులందరూ మాత్రం లోలోపలే అవినీతికి తెరతీస్తున్నారని ఆరోపణలు వస్తున్నాయి. అయితే ఈ వ్యాఖ్యలు చేసింది మరెవరో కాదు.. చిన్న నిర్మాతల మండలి అధ్యక్షుడు నట్టి కుమార్! అనుకోకుండా ఈయన దృష్టి సినిమాల మీద నుంచి రాజకీయాలవైపు ఎలా మళ్లిందో తెలియదు కానీ.. ఆయన మాత్రం ఈ విధంగా సంచలన వ్యాఖ్యలు చేసి కొత్త వివాదానికి తెరతీసినట్లు తెలుస్తోంది.

హైదరాబాద్‌లోని ఒక కార్యక్రమంలో ఆయన మాట్లాడుతూ.. టీడీపీ పార్టీకి చెందిన ఒక మంత్రి, అతని సహచరులు కొంతమంది కలిసి అక్రమ వసూళ్లకు పాల్పడుతున్నారని ఆయన అన్నారు. 2006-12 వరకు సర్వీసు ట్యాక్స్ మొత్తాన్ని మాఫీ చేయిస్తామంటూ అక్రమంగా డబ్బులు వసూలు చేస్తున్నారని వెల్లడించారు. ఒక్కొక్క థియేటర్ యజమాని వద్ద నుంచి సుమారు రూ.50వేల చొప్పున వసూలు చేశారని ఆయన ఆరోపణలు చేశారు. టీడీపీ మంత్రి, ఆయన అనుచరుడు అశోక్‌కుమార్ ఇద్దరూ గోవిందరాజు అనే మధ్యవర్తితో కలిసి ఇప్పటికే దాదాపు 12 కోట్ల రూపాయల వరకు డబ్బులు వసూలు చేసినట్లు ఆయన స్పష్టం చేస్తున్నారు.

ఇందులో భాగంగానే ఆయన మాట్లాడుతూ.. కేవలం మంత్రి అనుచరులే కాకుండా ఎన్వీ ప్రసాద్, పూర్వీ రాజు, చిన్ని, జనార్థన్, అలంకార్ ప్రసాద్‌లకు కూడా ఈ వసూళ్లలో భాగముందని ఆయన స్పష్టం చేశారు. పార్టీ అధికారంలోకి వచ్చి ఇంకా సరిగ్గా మూడునెలలైనా కాలేదు కానీ.. ఆ పార్టీకి చెందిన మంత్రి ఒకరు అప్పుడు అక్రమాలకు ఒడిగట్టడం చాలా ఆశ్చర్యానికి గురిచేస్తోందని ఆయన తెలిపారు. ఒకవైపు చంద్రబాబు అభివృద్ధిబాటలో అడుగులు వేస్తుండగా.. ఆయన మంత్రులు మాత్రం ఇలా వ్యవహరించడం చాలా దురదృష్టకరమని పేర్కొన్న ఆయన.. అటువంటి మంత్రులను, వారి అనుచరులను 24 గంటల్లోగా అరెస్టు చేయాలని డిమాండ్ చేశారు.