క్రిమినల్ మంత్రుల లిస్ట్ లో తెలంగాణ ఫస్ట్

Posted: 08/30/2014 10:19 AM IST

కొత్తగా ఏర్పడ్డ తెలంగాణ రాష్ర్ట వేగంగా అభివృద్ధి దిశగా అడుగులు వేస్తోంది. సీఎం కేసీఆర్, ఆయన కేబినెట్ కొత్త రాష్ర్టాన్ని తీర్చిదిద్దేందుకు అహర్నిశలూ కష్టపడుతున్నారు. విదేశీ పర్యటనలు చేసి అలసిపోతున్నారు. అభివృద్ధిలో తెలంగాణ రాష్ర్టాన్ని దేశంలోనే అగ్రస్థానంలో ఉంచాలనుకుని భావిస్తున్నారు. అభివృద్ధి మాట దేవుడెరుగు కాని.., క్రిమినల్ మంత్రుల జాబితాలో మాత్రం తెలంగాణే టాప్ ప్లేస్ లో ఉంది. దాదాపు అందరు తెలంగాణ మంత్రులపై కేసలున్నాయి. వీరిలో 90శాతం మంత్రులపై క్రిమినల్ కేసులుండటం విశేషం.

‘ది అసోసియేషన్ ఆఫ్  డెమొక్రటిక్ రిఫార్మ్స్’ అనే సంస్థ దేశంలో క్రిమినల్ కేసులు ఉన్న నేతల వివరాలను విడుదల చేసింది. గత రెండేళ్ళలో ఎన్నికైన ప్రజా ప్రతినిధులు, వారిపై ఉన్న క్రిమినల్ కేసుల వివరాలు ఇందులో ఉన్నాయి. ఈ లిస్ట్ ప్రకారం తెలంగాణలో అత్యదికంగా 90శాతం మంత్రులపై క్రిమినల్ కేసులు ఉన్నట్లు చెప్పింది. ఆ తర్వాత మరో తెలుగు రాష్ర్టం ఆంద్రప్రదేశ్ 56శాతం మంత్రులపై క్రిమినల్ కేసులతో రెండవ స్థానంలో ఉంది. 34శాతంతో కర్ణాటక, 27శాతంతో ఒడిశా రాష్ర్టం తర్వాత స్థానాల్లో ఉన్నాయి. ఈ మంత్రుల సారధులు కేసీఆర్, చంద్రబాబులపై కూడా క్రిమినల్ కేసులున్నాయని సంస్థ స్పష్టం చేసింది.

అయితే మిజోరం, మేఘాలయ, త్రిపుర, సిక్కిం, నాగాలాండ్ రాష్ర్టాల్లో ఒక్క మంత్రిపై కూడా క్రిమినల్ కేసులు నమోదు కాకపోవటం విశేషమని ఏడిఆర్ వెల్లడించింది. ప్రజల కోసం ఎంతో శ్రమించే సమయంలో కొన్ని కోర్టు చిక్కులు. కేసులు తప్పవని.., ప్రజా జీవితంలో ఇవన్నీ సాధారణమని ఈ లిస్ట్ లో పేరున్న పలువురు నేతలంటున్నారు. అయితే కేసులు సరే కాని.., క్రిమినల్ కేసుల సంగతి ఏంటని సామాన్యులు ప్రశ్నిస్తున్నారు. తమ కోసం ఏం నేరం చేశారో చెప్పాలని ప్రజలు ప్రశ్నిస్తున్నారు.

 

కార్తిక్