ఇవాళే చివరి తేది

Posted: 09/11/2014 10:42 AM IST

మెదక్ ఎన్నికల ప్రచారం తుది అంకానికి చేరింది. ఈ సాయంత్రంతో ఎన్నికల ప్రచారం ముగియనుంది. సెప్టెంబర్ 13న జరిగే మెదక్ ఎంపీ స్థానం ఉప ఎన్నికకు గురువారం సాయంత్రం 5గంటలతో ప్రచార గడువు ముగుస్తున్నట్లు ఎన్నికల కమిషన్ తెలిపింది. గడువు దగ్గర పడటంతో ఓటర్లను ప్రసన్నం చేసుకునేందుకు అన్ని పార్టీలు శతవిధాల ప్రయత్నిస్తున్నాయి. అధికారులు ఎంత నిఘా పెట్టినా ఈ దఫా ఉప ఎన్నికలో కూడా డబ్బు, మద్యం, ఇతర ప్రలోభాలు ఓటర్లకు ఆశ చూపుతూనే ఉన్నాయి. వీటిపై పలు కేసులు నమోదు చేసినట్లు పోలిసులు తెలిపారు.

ఇక చివరి రోజు ప్రచారంలో బీజేపి అగ్రనేతలు రంగంలోకి దిగుతున్నారు. ఇవాళ జరిగే ప్రచార కార్యక్రమాల్లో బీజేపి అభ్యర్ది జగ్గారెడ్డికి అనుకూలంగా ప్రచారం చేసేందుకు కేంద్రమంత్రులు వస్తున్నారు. ప్రకాష్ జవదేకర్, పియూష్ గోయల్, సదానందగౌడలు ప్రచారంలో పాల్గొంటున్నారు. ఎంపీ నియోజకవర్గ పరిధిలోని పలు ప్రాంతాల్లో ప్రచార సభలు నిర్వహిస్తున్నారు. వీరిలో ప్రకాష్ జవదేకర్ కు తెలంగాణతో పాత పరిచయం ఉంది. ఉద్యమం సమయంలో కూడా  పలుమార్లు హైదరాబాద్, ఢిల్లీలో జరిగిన ఆందోళనల్లో స్వయంగా పాల్గొని తెలంగాణ కోసం నినదించారు.

తెలంగాణ ముఖ్యమంత్రి కేసీఆర్ రాజీనామాతో ఖాళీ అయిన మెదక్ ఎంపీ స్థానంకు జరిగే ఉప ఎన్నిక ప్రతిష్టాత్మకంగా మారింది. తొలి ఎన్నికల్లో కారు జోరు కొనసాగితే అందుకు కళ్లెం వేయాలని బీజేపీ, కాంగ్రెస్ తీవ్రంగా శ్రమిస్తున్నాయి. అయితే పోటి మాత్రం టీఆర్ఎస్ బీజేపి మద్యే ఉంది. టీఆర్ఎస్ తరపున కె. ప్రభాకర్ రెడ్డి, బీజేపి నుంచి జగ్గారెడ్డి బరిలోకి దిగుతున్నారు. గులాబిదళం కంచుకోటలో వికసించాలని కమలం వర్గం ఉవ్విళ్లూరుతోంది. అటు పోటాపోటిగా ప్రచారం జరుగుతుండటంతో పాటు గెలుపు అవకాశాలు కూడా సమీకరణాలను బట్టి ఇద్దరి మద్య దోబూచులాడుతున్నాయి. దీంతో ఓటరు దేవుళ్లు ఎవరిని అందలమెక్కిస్తారని అంతా ఎదురుచూస్తున్నారు.

కార్తిక్