మా దశాబ్దాల ఉద్యమాలు మీకు కనబడవా..?

Posted: 09/13/2014 08:14 AM IST

Telangana cm kcr says no to new districts

జిల్లాల పునర్ విభజన ఎప్పుడెప్పుడు చేపడతారా..? అని ఎదురు చూస్తున్న ప్రజలకు తెలంగాణ ముఖ్యమంత్రి కేసీఆర్ నిరాశనే మిగిల్చారు. తెలంగాణ ప్రత్యేక రాష్ట్ర సాధన కోసం పార్టీని స్థాపించి, పద్నాలుగు ఏళ్ల కాలంలో రాష్ట్రాన్ని సాధించిన టీఆర్ఎస్.. తమ ప్రాంతాలను జిల్లా కేంద్రాలుగా మార్చాలంటూ అంతకు పూర్వం నుంచి సాగుతున్న ఉద్యమాలను తేలిగ్గా తీసుకోవడంతో ప్రజలు ప్రభుత్వానికి వ్యతిరేకంగా మారుతున్నారు. ఇటీవల జరిగిన ఎన్నికలలో తమకు హామీనిచ్చిన పార్టీ.. అధికారంలోకి వచ్చినా జిల్లాల పునర్విభజనపై ఇప్పటికీ నిర్ణయం తీసుకోకపోవడాన్ని వారు తప్పుబడుతున్నారు. నియోజకవర్గాల పునర్విభజన తరువాతే.. ఆదనపు జిల్లా కేంద్రాలను ఏర్పాటు చేస్తామని సీఎం కేసీఆర్ తాజా ప్రకటనపై వారు మండిపడుతున్నారు. ఎన్నికలకు మందు ఓ మాట, తరువాత మరో మాట అంటూ నిట్టూరుస్తున్నారు. ప్రభుత్వానికి వ్యతిరేకంగా ఆందోళన కార్యక్రమాలు చేపడుతున్నారు.

మెదక్ జిల్లాలోని సిద్దిపేటను జిల్లా కేంద్రంగా మార్చాలంటూ దాదాపు మూడు దశాబ్దాలుగా స్థానికులు ఉద్యమిస్తున్నారు. జిల్లా కేంద్రం సంగారెడ్డికి ఏదైనా వ్యవహారంపై వెళ్లాలంటే సుమారు 150 కిలోమీటర్ల మేరు వారు ప్రయాణం సాగించాల్సిందే. ఇక రంగారెడ్డి జిల్లాలోని వికారాబాద్, తాండూరు, పరిగి, చేవెళ్ల నియోజకవర్గాల ప్రజలు కూడా వికారాబాద్ ను జిల్లా కేంద్రంగా మార్చాలని డిమాండ్ చేస్తున్నారు. తమ ప్రాంతాన్ని జిల్లా కేంద్రంగా మార్చాలన్న ఢిమాండ్ లు కొన్ని ప్రాంతాల్లో ముందునుంచి వస్తుండగా, మరి కొన్ని ప్రాంతాల్లో రాజకీయ నేతల హామీలతో ఈ డిమాండ్లు పుట్టుకోచ్చాయి.

అదనపు జిల్లా కేంద్రాల ఏర్పాటులో ఇంకా సమయం ఉందని చెబుతున్న సీఎం కేసీఆర్.. ప్రజాగ్రహం పెల్లుబిక్కక ముందే వాటిని ఏర్పాటు చేయాలని, లేని పక్షంలో తమ ప్రభుత్వం ఎంత చేసినా.. ప్రజల విమర్శలకు లోను కావాల్సి వస్తుందని టీఆర్ఎస్ వర్గాలు అభిప్రాయపడుతున్నారు.

జి.మనోహర్