త్వరలోనే ఏపీలో పోలిస్ ఉద్యోగాల భర్తీ.., సీసీ కెమెరాలు

Posted: 09/14/2014 11:13 AM IST

ఆంధ్రప్రదేశ్ లో పోలిస్ ఉద్యోగాల భర్తీ నోటిఫికేషన్ త్వరలోనే వెలువడుతుందని హోంమంత్రి నిమ్మకాయల చినరాజప్ప తెలిపారు. ఖాళీగా ఉన్న పోస్టులను త్వరలనే భర్తీ చేస్తామన్నారు. ఆదివారం ఉదయం శ్రీశైలంకు వెళ్ళిన రాజప్ప.., బ్రమరాంబ సమేత మల్లిఖార్జున స్వామిని దర్శించుకున్నారు. అనంతరం మీడియాతో మాట్లాడుతూ.., దేవాలయాల అభివృద్ది కోసం ప్రత్యేక చర్యలు తీసుకుంటామన్నారు. భక్తులకు మెరుగైన సౌకర్యాలు అందించేందుకు కృషి చేస్తామన్నారు. ఇక ఆలయాల భద్రతకు పటిష్ట చర్యలు చేపట్టడంతో పాటు ప్రభుత్వం కొత్త ట్రస్టీలను ఏర్పాటు చేస్తుందన్నారు.

అదేవిధంగా మహిళల భద్రతకు పెద్దపీట వేస్తామని మంత్రి తెలిపారు. మహిళలను వేధించేవారికి కఠిన శిక్షలు తప్పవని హెచ్చరించారు. పట్టణాల్లో సీసీ కెమెరాలను ఏర్పాటు చేసి నిఘా పెడతామన్నారు. ఏపీలో నేరాలను తగ్గించేందుకు అవసరమైన అన్ని చర్యలు తీసుకుంటామని చెప్పారు. ఇంటలిజెన్స్ వ్యవస్థను అప్రమత్తం చేసి ఎప్పటికప్పుడు భద్రతా చర్యలను సమీక్షిస్తామన్నరు. ఆలయానికి వచ్చిన మంత్రికి అధికారులు ప్రత్యేక స్వాగతం పలికారు. దర్శనం తర్వాత వేద పండితులు మంత్రిని ఆశీర్వదించి తీర్ధ ప్రసాదాలు అందించారు.

 

కార్తిక్