ఏపీలోనూ సర్వేకు సిద్దమవుతున్న సర్కారు

Posted: 09/15/2014 12:07 PM IST

ఏపీలో సర్వే చేసేందుకు టీడీపీ ప్రభుత్వం సమాయత్తం అవుతున్నట్లు తెలుస్తోంది. గత నెలలో ఎవరు వద్దన్నా.., కాదన్నా.. కేసీఆర్ ప్రభుత్వం సమగ్ర సర్వే చేసి తీరింది. అన్ని పార్టీలతో పాటుగా టీడీపీ కూడా నాటి సర్వేను వ్యతిరేకించింది. అయితే ఇప్పుడు మాత్రం సర్వేకు సిద్ధం అవుతోంది ఏపీలో అధికారంలో ఉన్న టీడీపీ సర్కారు. త్వరలోనే సర్వే చేసేందుకు ప్రణాళికలు రూపొందిస్తోంది. అయితే ఇది మాత్రం తెలంగాణ ప్రభుత్వ సర్వేలా ఒకే రోజు సర్వే కాదు.., అదేవిధంగ సమగ్ర సర్వే కాదు. కేవలం రేషన్ కార్డుల సర్వే. బోగస్ రేషన్ కార్డులను ఎత్తేసేందుకు సర్వే చేయాలని ప్రభుత్వం నిర్ణయించింది. మంత్రి పరిటాల సునీత ఈ విషయాన్ని వెల్లడించారు.

జిల్లాల వారిగా సర్వే చేసేందుకు ప్రభుత్వం ప్రణాళికలు రూపొందిస్తుందన్నారు. ముందుగా తూర్పుగోదావరి జిల్లాలో పైలట్ ప్రాజెక్టుగా సర్వే అమలు చేస్తామని చెప్పారు. అటు ఇకపై అవకతవకలు జరగకుండా ప్రత్యేకంగా ఈ-పాస్ ద్వారా సర్వే చేసి అందరి వివరాలు వెబ్ సైట్ లో నమోదు చేస్తారని చెప్పారు. గతంలో ఉమ్మడి రాష్ర్టంలో విద్యార్థుల స్కాలర్ షిప్ ల జారీ కోసం కిరణ్ సర్కారు ఈ-పాస్ తీసుకువచ్చింది. దీని తరహాలోనే అందరి వివరాలను కంప్యూటరీకరణ చేసి ఒకే సర్వర్లో ఉంచుతారు. ఫలితంగా బోగస్ కార్డుల ఏరివేత సులభం అవుతుంది. సర్వే వల్ల ప్రభుత్వ నిధులు దుర్వినియోగం కాకుండా కాపాడవచ్చని మంత్రి సునీత అంటున్నారు. ఈ సర్వే కూడా తెలంగాణ సర్కారు సర్వేలా వివాదాలకు కారణం అవుతుందా లేక సాఫీగా సాగుతుందా చూడాలి.

కార్తిక్