ఏపీకి బ్రాండ్ అంబాసిడర్ కావలెను..

Posted: 09/20/2014 10:50 AM IST

తెలంగాణ రాష్ట్ర బ్రాండ్ అంబాసిడర్, భారత టెన్నిస్‌ స్టార్‌ సానియా మీర్జా యూఎస్‌ ఓపెన్‌లో మిక్స్‌డ్‌ డబుల్స్‌ టైటిల్‌ సాధించి, తెలంగాణ పేరును విశ్వవ్యాప్తం చేయడంతో.. తామకు కూడా ఒక బ్రాండ్ అంబాసిడర్ వుంటే బాగుంటుందన్న ఆలోచన ఆంధ్రప్రదేశ్ ప్రభుత్వానికి కలిగినట్లు వుంది. నవ్యాంధ్రప్రదేశ్‌కు దేశవిదేశాల్లో విస్తృతప్రచారం కల్పించడానికి రాష్ట్రానికి ఓ బ్రాండ్ అంబాసిడర్‌ను నియమించాలని ముఖ్యమంత్రి చంద్రబాబు యోచిస్తున్నట్లు సమాచారం. పేరుప్రతిష్ఠలతోపాటు, నిబద్ధత ఉన్న వ్యక్తులను ఇందుకోసం ఎంచుకోవాలని చూస్తున్నట్లు తెలిసింది.

ఇదివరకు గుజరాత్ పర్యాటకశాఖకు అమితాబచ్చన్, పాఠశాలల్లో పరిశుభ్రత ప్రోత్సాహానికి అమీర్‌ఖాన్, కేంద్రగ్రామీణాభివృద్ధిశాఖకు బాలీవుడ్‌ నటి విద్యాబాలన్ బ్రాండ్ అంబాసిడర్‌లుగా పనిచేశారు. ప్రభుత్వం చేపట్టే పథకాలను ప్రజల్లోకి సూటిగా తీసుకెళ్లి సమర్థమైన ఫలితాలు సాధించడానికి బ్రాండ్అంబాసిడర్లు ఉపయోగపడతారని భావిస్తున్నారు. త్వరలో రాష్ట్ర ప్రభుత్వం మొదలుపెట్టబోయే ఏడు మిషన్లకు వేర్వేరు బ్రాండ్ అంబాసిడర్లను నియమించాలా? లేదంటే రాష్ట్ర ప్రభుత్వానికి మొత్తంగా ఒక బ్రాండ్ అంబాసిడర్‌ను నియమించాలా? అన్నదానిపై ప్రస్తుతం చంద్రబాబు కసరత్తు జరుగుతున్నట్లు సమాచారం.

జి మనోహర్