ఆడ, మగల మద్య కంచె వేసేశారు

Posted: 10/04/2014 04:41 PM IST

మహిళల భద్రత కోసం  తెలంగాణ ప్రభుత్వం ప్రత్యేక చర్యలు చేపట్టింది. మహిళా సమస్యలపై అధ్యయనం చేసిన కమిటి ఇచ్చిన సూచనల మేరకు హైదరాబాద్ లో సిటి బస్సుల్లో ఇనుప కంచెలను అమల్లోకి  తీసుకువచ్చింది. ముందుగా  అఫ్జల్ గంజ్ నుంచి సికింద్రాబాద్ మార్గంలో నడిచే బస్సుల్లో స్త్రీలు, సాధారణ సీట్ల మద్య ఇనుప కంచెను ఏర్పాటు చేశారు. దీని వల్ల సిటి బస్సుల్లో వెనక నుంచి మహిళలపై దాడులు జరిగే అవకాశాలను తగ్గించవచ్చని ప్రభుత్వం  చెప్తోంది. దసరా పండగనుంచి ఈ కార్యక్రమం  మొదలు పెట్టారు. తొలి దఫాలో వచ్చిన ఫలితాన్ని బట్టి మిగతా బస్సులకు కూడా ఫెన్సింగ్ వేయటంపై నిర్ణయం తీసుకుంటామని ఆర్టీసీ అధికారులు చెప్తున్నారు.

ఉన్నతాధికారి పూనం మాలకొండయ్య సహా అధికారులతో  ఏర్పాటైన కమిటి మహిళా భద్రతా చర్యలపై పలు వర్గాల నుంచి సలహాలు, సూచనలు తీసుకుంది. ఐటీ కారిడార్ లో భద్రత కోసం ప్రత్యేక చర్యలు, రద్దీ ప్రాంతాలు, బస్సులు ఇలా మహిళలపై దాడులు, ఆకతాయిల వేధింపులకు అవకాశం ఉన్న చోట్ల వాటిని నివారించటంపై నివేదికను తయారుచేసి ప్రభుత్వానికి అందించింది. ఈ కమిటి సూచలన ప్రకారం బస్సుల్లో ఆకతాయిల వేధింపులను తగ్గించేందుకు ఇలా ఇనుప కంచె లేదా రాడ్ లను అమర్చుతున్నారు.

 

కార్తిక్