విశాఖలో అర్ధరాత్రి చంద్రబాబు తనిఖీలు

Posted: 10/18/2014 07:21 AM IST

హుద్ హుద్ తుఫానుతో స్వరూపం కోల్పోయిన విశాఖను పునర్నిర్మించే వరకు నిద్రపోను అని ప్రకటించిన ఏపీ సీఎం చంద్రబాబు.., అందుకు తగ్గట్లే వ్యవహరిస్తున్నారు. తాను పడుకోకుండా.., అధికారులను కూడా నిద్రపోనివ్వటం లేదు. తుఫాను పునరావాస చర్యలతో పాటు.., విశాఖ పునర్నిర్మాణం పనులు వేగవంతంగా జరుగుతున్నాయి. వీటి పురోగతిపై ముఖ్యమంత్రి స్వయంగా ప్రతిరోజు సమీక్షిస్తున్నారు. ఉదయం సమయంలో ప్రజలను కలుస్తూ వారికి భరోసా ఇస్తున్న ముఖ్యమంత్రి సాయంత్రం సమీక్షలు జరుపుతున్నారు.

శుక్రవారం రోజు రాత్రి అకస్మాత్తుగా చంద్రబాబు రోడ్లపైకి వచ్చారు. నగరంలో జరుగుతున్న పనులను పరిశీలించేందుకు ఆకస్మిక తనిఖీలు పరిశీలించారు. గురుద్వారా, బస్టాండ్ సహా ఇతర ప్రాంతాల్లో పర్యటించి పనులు జరుగుతున్న తీరును తెలుసుకున్నారు. అర్ధరాత్రి కూడా అధికారులు, సహాయక సిబ్బంది పనులు చేయటంపై సంతృప్తి వ్యక్తం చేసిన ఏపీ ముఖ్యమంత్రి పనుల్లో మరింత వేగం పెంచాలని సూచించినట్లు తెలుస్తోంది. బాబు ఆకస్మిక తనిఖీల విషయం తెలుసుకున్న ప్రజలు లీడర్ అంటే ఇలా ఉండాలి అని మెచ్చుకుంటున్నారు.

 

కార్తిక్