కర్ణాటక హైకోర్టులో మాజీ ముఖ్యమంత్రికి చుక్కెదురు..

Posted: 10/21/2014 05:35 PM IST

కర్ణాటక మాజీ ముఖ్యమంత్రి, ఎంపీ యడ్యూరప్పకు కర్నాటక హకోర్టులో చుక్కెదురైంది. ఆయనను అధికారానికి దూరం చేసి..కేసులు మరోమారు వెంటాడుతున్నాయి. ఆదాయానికి మించి ఆస్తుల కేసులతో పాటు అక్రమంగా ఆస్తుల సంపాదించిన కేసులో యడ్యూరప్ప దాఖలు చేసిన పిటీషన్ ను హైకోర్టు తిరస్కరించింది. ఆయనకు వ్యతిరేకంగా దాఖలైన పిటిషన్ను స్వీకరించి విచారణ చేయాలని హైకోర్టు షిమోగా కోర్టును ఆదేశించింది.  

యడ్యూరప్ప షిమోగాలో అటవీ భూమిని ఆక్రమించినట్టు ఆరోపణలు వచ్చాయి.  కాగా  కేసు విచారణకు గతంలో షిమోగా కోర్టు నిరాకరించింది. కేసు విచారణకు అనుమతి లేదంటూ ఎఫ్ఐఆర్ను కొట్టివేసింది. అయితే ఈ కేసును కొత్తగా విచారించాల్సిందిగా హైకోర్టు షిమోగా కోర్టును ఆదేశించింది. గతంలో అవినీతి ఆరోపణలు రావడంతో యడ్యూరప్ప కర్ణాటక ముఖ్యమంత్రి పదవికి రాజీనామా చేశారు. అనంతరం బీజేపీని వీడిన యడ్యూరప్ప కర్ణాటక అసెంబ్లీ ఎన్నికల అనంతరం మళ్లీ సొంతగూటికి వెళ్లారు.

జి.మనోహర్