సహాయకచర్యలా..? విజయోత్సవసభలా.? టీడీపీని ప్రశ్నించిన సీపీఎం

Posted: 10/24/2014 02:44 PM IST

హుదూద్ తుపాను సహాయక కార్యక్రమాలను టీడీపీ ప్రభుత్వం విజయోత్సవ సభలా నిర్వహిస్తోందని సీపీఎం ఆంధ్రప్రదేశ్ రాష్ట్ర కార్యదర్శి మధు ఎద్దేవా చేశారు. ఇవాళ ఆయన తుపాను ప్రభావిత ప్రాంతాలలో పర్యటించారు. ఇంతకంటే భయానకమైన తుపాన్లను ఎదుర్కొన్న ఒడిశాలో ఆ రాష్ట్ర ముఖ్యమంత్రి ఇంత హంగామా ఎన్నడూ చేయలేదని అన్నారు. ఐదేళ్ల తరువాత వచ్చే ఎన్నికల కోసం ఇప్పటి నుంచే చంద్రబాబు పాకులాడుతున్నారని ఆయన మండిపడ్డారు. ప్రజలకు సేవ చేస్తే వారు మేలు గుర్తుపెట్టుకుంటారని.. దానికి పార్టీ కార్యక్రమం మాదిరిగా హంగామా చేయాల్సిన అవసరం లేదని విమర్శించారు.

ఎన్నికల్లో గెలిస్తే రైతులకు రుణమాఫీ చేస్తామని చెప్పి అధికారంలోకి వచ్చిన టీడీపీ ఇప్పుడు ఆ అంశంలో దాటివేత దోరణి అవలంభిస్తుందని ఆరోపించారు. చంద్రబాబు ఎప్పడు అధికారంలోకి వచ్చినా రైతులు తీవ్రంగా నష్టపోతున్నారని ఆయన ధ్వజమెత్తారు. ఇప్పటికీ రుణమాఫీ చేయకపోవడంతో రైతులు తీవ్రంగా నష్టపోయారని మధు ఆవేదన వ్యక్తం చేశారు. రుణమాఫీ వెంటనే అమలు చేయాలని ఆయన చంద్రబాబు ప్రభుత్వాన్ని డిమాండ్ చేశారు.

జి.మనోహర్