నివాసాన్ని ఖాళీ చేయమంటూ చిరంజీవికి నోటీసులు!

Posted: 11/13/2014 09:18 PM IST

Estate directorate officers notices chiranjeevi to leave official residence immediately

మాజీకేంద్రమంత్రి, మెగాస్టార్ చిరంజీవికి వెంటనే తన ఇంటిని ఖాళీ చేయాలంటూ తాజాగా నోటీసులు జారీ అయ్యాయి. గతంలో కూడా ఇటువంటి నోటీసులే జారీ అయినప్పటికీ వాటిని చిరు బేఖాతరు చేయడంతో ఈసారి కాస్త సీరియస్ గానే మళ్లీ నోటీసులు జారీ చేశారు. మునుపటిలా నిర్లక్ష్యం చేయకుండా తన నివాసాన్ని ఖాళీ చేయాల్సిందేనని అధికారులు పట్టుమీద వున్నారని సమాచారం! అయితే ఇక్కడ చిరుని ఖాళీ చేయమంటోంది ఆయన సొంత నివాసాన్ని కాదులెండి... యూపీఏ-2 ప్రభుత్వంలో కేంద్రమంత్రిగా వున్నప్పుడు ఆయనకు ప్రత్యేకంగా కేటాయించిన ఇంటిని ఖాళీ చేయాలని డిమాండ్ చేస్తున్నారు.

కాంగ్రెస్ పార్టీ అధికారంలో వున్నప్పుడు చిరంజీవి కొన్నాళ్లపాటు కేంద్రటూరిజం శాఖమంత్రిగా కొనసాగిన విషయం తెలిసిందే! ఆ సమయంలో ఆయనకు ప్రత్యేకంగా ఒక ఇంటిని కేటాయించారు. అయితే సార్వత్రిక ఎన్నికల్లో పార్టీ ఘోరంగా పరాజయం కావడం వల్ల ఆ పార్టీ తుడిచిపోవడంతోపాటు మంత్రలందరూ తమ పదవులను కోల్పోయారు. అలాగే చిరు కూడా తన పదవిని కోల్పోయారు. అయితే యూపీఏ హయాంలో కేంద్ర మంత్రిగా ప్రభుత్వ సౌకర్యాలను అనుభవించిన చిరంజీవి, యూపీఏ గద్దెదిగినప్పటికీ ఆ ఇంటిని ఇంతవరు ఖాళీచేయలేదు. నిజానికి 2014 మే 30తోనే ఆయన అధికారిక నివాసం గడువు ముగిసింది.. కానీ ఆయన మాత్రం ఖాళీ చేయలేదు.

దీంతో చిరంజీవి తన అధికారిక నివాసాన్ని తక్షణమే ఖాళీ చేయాలంటూ ఎస్టేట్ డైరెక్టరేట్ అధికారులు అక్బర్ రోడ్డులోని 17వ నెంబరు ఇంటికి నోటీసులు అంటించారు. రాజ్యసభ సభ్యుడిగా ఉన్న చిరంజీవి ఇదే నివాసంలో కొనసాగాలని భావించినప్పటికీ, మంత్రులకు కేటాయించాల్సిన ఈ క్వార్టర్‌ను ఎంపీకి కేటాయించలేమని అధికారులు తేల్చిచెప్పారు. ఆ దెబ్బతో ఆయనకు ఆ ఇంటిని ఖాళీ చేయడం తప్ప మరోమార్గం లేదు. జూన్ 27వ తేదీ నాటికే గడువు ముగిసిందని గతంలోనే అధికారులు నోటీసులు ఇచ్చారు. అయితే ఇప్పటికీ ఖాళీ చేయకపోవడంతో తక్షణం ఖాళీ చేయాలంటూ ఆ ఇంటికి నోటీసులు అంటించారు.