అసలు మీకు 'ఇంగితజ్ఞానం' వుందా..?

Posted: 11/14/2014 08:16 PM IST

Nizamabad mp kavita sensational comments on opposition parties

ఆమధ్య విపక్షాలపైనా, ఇతర వ్యవహారాల మీద కొన్ని వివాదాస్పద వ్యాఖ్యలు సంధించి సంచలనం సృష్టించిన నిజామాబాద్ ఎంపీ కవిత... తాజాగా మరోసారి వార్తల్లోకెక్కింది. ప్రతిపక్షాలు ఆమె మీద చేసిన ఆరోపణల నేపథ్యంలో ఆమె బదులిస్తూ.. ‘‘అసలు మీకు ఇంగిత జ్ఞానం వుందా..?’’ అన్న తరహాలో కామెంట్లు చేశారు. నిజానికి టీఆర్ఎస్ పార్టీ, విపక్ష పార్టీల నాయకుల మధ్య ఎప్పటినుంచో ఆరోపణాస్త్రాలను సంధించుకుంటున్న విషయం తెలిసిందే! ఆ నేపథ్యంలో సమగ్ర కుటుంబసర్వే నేపథ్యంలో ఎన్నో విమర్శలు చేసుకున్నారు. అందులో భాగంగానే ఎంపీ కవిత తనదైన శైలిలో సమాధానమిచ్చింది.

ఇంగ్లండ్ పర్యటన ముగించుకుని శుక్రవారం ఉదయం హైదరాబాద్ చేరుకున్న ఆమెకు శంషాబాద్ విమానాశ్రయంలో పార్టీ కార్యకర్తలు ఘన స్వాగతం పలికారు. ఈ సందర్భంగా ఆమె మీడియాతో మాట్లాడుతూ, తనపై లేనిపోని అభాండాలు మోపవద్దని విపక్షాలకు విజ్ఞప్తి చేశారు. సమగ్ర సర్వే సందర్భంగా తాను రెండు చోట్ల పేరు నమోదు చేయించుకున్నానన్న ఆరోపణల్లో ఏమాత్రం వాస్తవం లేదని.. అవి కేవలం విపక్షాలు లేపిన రూమర్లు మాత్రమేనని చెప్పారు. అసలు ఆ వార్తల్లో ఎంతమాత్రం వాస్తవం లేదన్నారు. చివరగా ‘‘ఏమాత్రం ఇంగిత జ్ఞానం ఉన్న వారైనా ఈ తరహా ఆరోపణలు చేయరు’’ అని ఆమె అన్నారు.