మహిళలకు 2లక్షల టాయ్ లెట్లు, 100 కోర్టులు

Posted: 11/27/2014 07:30 AM IST

ఢిల్లీ పీఠం చేజిక్కించుకునేందుకు అన్ని పార్టీలు తమవంతుగా ఆఫర్లు ప్రకటిస్తున్నాయి. హామిలతో ప్రజలను ఆకట్టుకునేందుకు ప్రయత్నాలు చేస్తున్నాయి. ఇందులో భాగంగా ఆప్ కన్వీనర్, ఢిల్లీ మాజి సీఎం అరవింద్ కేజ్రివాల్ ప్రజలకు ఆఫర్ ప్రకటించారు. మహిళల కోసం రెండు లక్షల పబ్లిక్ టాయిలెట్లు కట్టిస్తామని హామీ ఇచ్చారు. 'ఢిల్లీ డైలాగ్' పేరిట జరిగిన కార్యక్రమంలో కేజ్రీవాల్ మాట్లాడుతూ, మహిళల టాయ్ లెట్ల సమస్యకు తాము పరిష్కారం చూపిస్తామన్నారు. అదేవిధంగా రాష్ట్రంలో చోటుచేసుకుంటున్న రేప్ కేసుల విచారణకు వంద ఫాస్ట్ ట్రాక్ కోర్టులు ఏర్పాటు చేయిస్తామని అన్నారు.

అటు ఢిల్లీ మొత్తం వై-ఫై కనెక్టివిటీ ఉండే సీసీటీవీ కెమెరాలను అమరుస్తామని చెప్పారు. ఫలితంగా నేరాలు తగ్గటంతో పాటు నిరంతర నిఘా ఉంటుందని చెప్పారు. ఇక తమ ప్రాంతాలకు దగ్గర్లోని మద్యం దుకాణాలు మూసేయాలని ఢిల్లీలో మహిళలు కోరుకుంటే మూసేస్తామని చెప్పారు. ఢిల్లీలో తిరిగే ప్రతి డీటీసీ బస్సులో ఈవ్ టీజింగ్ ను అరికట్టేందుకు ఓ మార్షల్ ను పెడతామని హామి ఇచ్చారు. ఇలా ప్రజలకు భద్రత కల్పించటంతో పాటు వారి కనీస అవసరాలు, ఇబ్బందులను పరిష్కరిస్తామని కేజ్రివాల్ చెప్పారు.

 

కార్తిక్