తెగని ఇంటర్ పంచాయితీ.. బోర్డే మాదంటున్న టీఎస్ సర్కార్

Posted: 12/04/2014 07:26 PM IST

ఇంటర్‌ పరీక్షల నిర్వహణ విషయంలో ఇరు రాష్ట్ర ప్రభుత్వాలు స్పష్టమైన విధానంతో రావాలని ఇరు రాష్ట్రాల ప్రధాన కార్యదర్శులను.. గవర్నర్ ఈఎస్ఎల్ నరసింహన్ అదేశించి.. 24 గంటలు కూడా గడవక ముందే.. మరోసారి తమ పరీక్షలను తామే నిర్వహిస్తామని తెలంగాణ విద్యాశాఖ మంత్రి జగదీష్‌రెడ్డి స్పష్టం చేశారు. ఇవాళ మీడియా సమావేశంలో మాట్లాడుతూ, ఉమ్మడిగా ఇంటర్ పరీక్షలను నిర్వహించే ప్రసక్తే లేదని చెప్పారు. రాష్ట్ర పునర్ విభజన చట్టంలో పేర్కోన్న పదో షెడ్యూ ల్ ప్రకారం ఇంటర్ బోర్డు తెలంగాణ పరిధిలోకి వస్తుందని స్పష్టం చేశారు,

తమ అధీనంలో వున్న ఇంటర్ బోర్డుపై ఆంధ్రప్రదేశ్ ప్రభుత్వం పెత్తనం చేయాలని చూస్తుందని విమర్శించారు. అవసరమైతే ఆంద్రప్రదేశ్ ఇంటర్ పరీక్షలను తాము నిర్వహిస్తామని.. ఇందుకు పూర్తి సహకారం అందిస్తామని చెబుతున్నా.. చంద్రాబు కావాలని పేచీ పెట్టుకోవడం సమంజసం కాదన్నారు. పరిశ్రమలకు అనువైన విద్యాబోధన చేపడతామని, అందుకోసం ట్రిపుల్‌ఐ(ఇంటస్ర్టీ ఇన్‌స్టిట్యూట్‌ ఇంట్రాక్షన్‌) సంస్థను ఏర్పాటు చేయనున్నట్లు తెలిపారు. వారంలో పరిశ్రమలు, విద్యావేత్తలతో సమావేశంకానున్నట్లు మంత్రి జగదీష్‌రెడ్డి పేర్కొన్నారు.

జి. మనోహర్