సాకర్ అమ్మాయిలకు డ్రెస్ కోడ్ కష్టాలు

Posted: 09/11/2014 12:48 PM IST

సాకర్ లోకి దేశీయ సాంప్రదాయాలు అడుగుపెడుతున్నాయి. పొట్టి లాగులు వేసుకుని సాకర్ ఆడే అమ్మాయిలకు ఇప్పుడు కష్టాలు వచ్చి పడ్డాయి. ఇకపై తమ కాలేజీలో సాకర్ ఆడే అమ్మాయిలు సాంప్రదాయ డ్రెస్ కోడ్ పాటించాలని కాలేజీ మేనేజ్ మెంట్ ఆదేశించింది. అంటే మోకాళ్ళపైకి ఉండే స్కర్టులు, లాగులు వేసుకుని కాకుండా.., సల్వార్ కమిజ్, చుడీదార్ లాంటి దుస్తులు ధరించి సాకర్ ఆడాలని చెప్పింది. ఈ వింత నిర్ణయం పట్ల విద్యార్థినులు ఆగ్రహం వ్యక్తం చేస్తున్నారు. సల్వార్ కమీజ్ వేసుకుని ఎలా సాకర్ ఆడగలమని ప్రశ్నిస్తున్నారు. అయితే కాలేజి మేనేజ్ మెంట్ తమ నిర్ణయాన్ని వెనక్కితీసుకోకుండా అందుకు గల కారణాలు వివరిస్తోంది.

దేశ సాంప్రదాయాలు, ఆచారాలను గౌరవించాలనే ఉద్దేశ్యంతోనే డ్రెస్ కోడ్ తీసుకొచ్చామని మేనేజ్ మెంట్ చెప్తోంది. అంతేకాకుండా చిన్న చిన్న బట్టలు వేసుకొచ్చేవారిపై ఈవ్ టీజింగ్ లు, అసభ్యంగా ప్రవర్తించటం వంటి ఘటనలు తమ దృష్టికి వచ్చాయని తెలిపింది. అందువల్లనే సాంప్రదాయ సాకర్ కు తెరతీశామని  మేనేజ్ మెంట్ వెల్లడించింది. మేనేజ్ మెంట్ ఉద్దేశ్యం మంచిదే కావచ్చు కానీ.., ఆటల విషయంలో ఆంక్షలు పెట్టడంపై మాత్రం విద్యార్థినులు మండిపడుతున్నారు. అటు కొందరు పేరంట్స్ కూడా కాలేజి నిర్ణయాన్ని తప్పుబడుతున్నారు. సాంప్రదాయానికి సాకర్ కు మద్య జరుగుతున్న ఈ యుద్ధంపై చివరకు కాలేజి ఏ నిర్ణయం తీసుకుంటుందో చూడాలి.

కార్తిక్